მასაჩუსეტსის შტატში მდებარე Cape Wildlife Center-ის საავადმყოფოს 14 ივლისს უჩვეულო სტუმარი — გაბრაზებული ბატი ეწვია. ის თავის მეწყვილეს, არნოლდს ეძებდა, რომელიც საავადმყოფოში ცენტრის წევრებმა ოპერაციის გასაკეთებლად მოიყვანეს.

არნოლდი და მისი მეწყვილე ცენტრთან ახლოს მდებარე ტბის ბინადრები არიან. გარეული ბატები რამდენიმე წელია, რაც ერთად არიან და ადამიანებთან ურთიერთობით თავს იშვიათად იწუხებენ. მიუხედავად ამისა, ცენტრის ერთ-ერთმა წევრმა ცოტა ხნის წინ შეამჩნია, რომ არნოლდი კოჭლობდა, ამიტომ მისი საავადმყოფოში წამოყვანა გადაწყვიტა. როგორც აღმოჩნდა, არნოლდს ფეხი ორ ადგილას ჰქონდა მოტეხილი და მის გადასარჩენად ოპერაციის ჩატარება იყო საჭირო.

ფოტო: Cape Wildlife Center

როდესაც ვეტერინარები ოპერაციის ჩასატარებლად ემზადებოდნენ, ცენტრის კარზე კაკუნი გაისმა. გარეთ არნოლდის მეწყვილე იდგა, რომელიც სატრფოს ბედზე აშკარად ძალიან წუხდა. მას არნოლდის ადგილსამყოფელი როგორღაც დაედგინა და საავადმყოფოში შესვლას ცდილობდა.

საბედნიეროდ, ოპერაციამ წარმატებით ჩაიარა და როდესაც არნოლდი გამოფხიზლდა, ის შუშის კართან დასვეს, რათა შეყვარებულებს ერთმანეთის ნახვის შესაძლებლობა ჰქონოდათ. არნოლდის მეწყვილე მაშინვე დამშვიდდა და სატრფოს მიესიყვარულა.

არნოლდი რამდენიმე კვირის განმავლობაში საავადმყოფოში დარჩება და ბუნებას გამოჯანმრთელებული დაუბრუნდებდა. ამის შემდეგ კი ის და მისი შეყვარებული დიდხანს და ბედნიერად იცხოვრებენ.