საოკუპაციო რეჟიმის მიერ უკანონოდ დაკავებული საქართველოს მოქალაქის, ზაზა გახელაძის გათავისუფლებისთვის გორის და ატენის მიტროპოლიტი, მეუფე ანდრია მადლობას რუსეთს უხდის.

"მინდა, ყველას მივულოცო დღევანდელი მოვლენა, ნამდვილად ძალზედ დიდი და მნიშვნელოვანი და მივულოცო გახელაძეების ოჯახს. მალე სახლში იქნება ზაზა და მადლობა მოვახსენო ყველას, ვინც ჩართული იყო ამ პროცესში:

საქართველოს ხელისუფლება, ჩართული იყვნენ საერთაშორისო ორგანიზაციები, ჩართული იყო საქართველოს ეკლესია და უშუალოდ ჩვენი კათოლიკოს-პატრიარქი ილია მეორე. ასევე, დავამატებ, რომ მინდა, მადლობა გადავუხადო რუსეთის მხარეს, რომელმაც გაითვალისწინა, რა თქმა უნდა, ეს ერთობლივი ჩართულობა და ოსურ მხარესაც, რომელმაც, ასე ვთქვათ, შეწყალების ფორმით ზაზა გახელაძე გაათავისუფლა და დაუბრუნა თავის ოჯახს", — განაცხადა მეუფე ანდრიამ, რომელიც გათავისუფლებულ ზაზა გახელაძეს პრემიერმინისტრთან და ხელისუფლების სხვა წარმომადგენლებთან ერთად ერგნეთში დახვდა.

საოკუპაციო რეჟმის მიერ უკანონოდ დაკავებული ზაზა გახელაძე 14 ივლისს გაათავისუფალეს. გახელაძე საოკუპაციო რეჟიმის უკანონო პატიმრობაში ერთი წლის განმავლობაში იმყოფებოდა. ის ე.წ. სამხრეთ ოსეთის დე ფაქტო პრეზიდენტმა, ანატოლი ბიბილოვმა შეიწყალა. საოკუპაციო რეჟიმის სააგენტო, ბიბილოვის კომენტარს ავრცელებს, სადაც აღნიშნულია, რომ გახელაძე რუსეთის პატრიარქის, კირილის თხოვნით გაათავისუფლა. რამდენიმე კვირის წინ კირილს საქართველოს პატრიარქმა, ილია მეორემ მიწერა და გახელაძის გათავისუფლებაში დახმარება სთხოვა.

გარდა ამისა, რესი წერს, რომ გახელაძე საქართველოში მყოფ პატიმარში, გობოზოვში გაცვალეს. ამის შესახებ დასმულ კითხვას ერგნეთში მყოფმა პრემიერმინისტრმა არ უპასუხა.

"ძალიან ბევრ ვერსიას მოისმენთ, მაგრამ, მე გთხოვთ ყველას, რომ ვერსიებს აღარ მოუსმინოთ, ჩვენ შევხედოთ შედეგს. შედეგი არის ის, რომ ზაზა არის თავისუფალი", — განაცხადა მან.

გახელაძე ერთი წლის წინ გახელაძე კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.