58 წლის მარტინ კორდიმ, რომელიც ბრისტოლში ცხოვრობს, დახურულ სივრცეში პირბადის სავალდებულო ტარების აღსადგენად პეტიცია შექმნა. პეტიციას ამ დროისათვის უკვე 185 ათასმა ადამიანმა მოაწერა ხელი.

კორდის თქმით, მას ჯანმრთელობის არაერთი პრობლემა აქვს და "შეშფოთდა", როცა რეგულაციების შემსუბუქების შესახებ გაიგო. მას სურს, პირბადის ტარება სავალდებულო მანამდე იყოს, სანამ დაინფიცირებულთა რიცხვი მნიშვნელოვნად შემცირდება და მოსახლეობის უმეტესობა ორჯერ აიცრება.

კორდი ამბობს, რომ როცა 2020 წლის მარტში კარანტინი პირველად გამოცხადდა, სახლიდან, ფაქტობრივად, არ გადიოდა და მხოლოდ მეზობლების კეთილშობილების იმედად იყო. მიუხედავად იმისა, რომ მას ახლა ვაქცინის ორივე დოზა უკვე მიღებული აქვს, ფიქრობს, რომ სახლის დატოვება მაინც რისკის ქვეშ აყენებს.

"ჩემ მსგავსად ათასობით ადამიანი ფიქრობს", — ამბობს იგი, — "ისინი თავს ისევ დაუცველად გრძნობენ; თითქოს უკან ვბრუნდებით.

"სუპერმარკეტში ან მაღაზიაში ხალხი გიახლოვდება, რათა დახლიდან რაღაც ჩამოიღონ, რიგში შენ წინ ან უკან დგანან, ასე რომ, ამას ვერ გაექცევი. დახურულ სივრცეში პირბადის ტარება ის უმნიშვნელო მსხვერპლია, რის სანაცვლოდაც ეპიდსიტუაციის გაკონტროლებას შევძლებთ", — დასძენს კორდი.

კორდის მსგავსად ინგლისში უამრავი ადამიანი, მათ შორის ბევრი ექიმიც, ითხოვს, რომ პირბადის ტარება კვლავ სავალდებულო იყოს საზოგადოებრივ ტრანსპორტშიც.

გაერთიანებულ სამეფოში პანდემიის დაწყებიდან დღემდე კორონავირუსით დაინფიცირების 5,16 მილიონი და მისით გარდაცვალების 128 ათასი შემთხვევაა დაფიქსირებული. ამასთან, მოსახლეობის 52 პროცენტს ვაქცინის ორივე დოზა უკვე მიღებული აქვს, რის გამოც ქვეყნის პრემიერმინისტრმა 19 ივლისისთვის რეგულაციების უმეტესობის შემსუბუქება დააანონსა.

ფოტო: თამუნა გეგიძე / On.ge

ვითარება საქართველოში

ეპიდსიტუაცია გაუარესებულია ჩვენს ქვეყანაში. ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ, 13 ივლისს განაცხადა. ამ დღის მონაცემებით, საქართველოში კორონავირუსის 1 862 ახალი შემთხვევა დადასტურდა, გამოჯანმრთელდა 619, ხოლო გარდაიცვალა 11 ადამიანი.

პანდემიის დაწყებიდან დღემდე საქართველოში კორონავირუსით ინფიცირების 379 673 და მისით გარდაცვალების 5 479 შემთხვევაა დადასტურებული. ამ დროისათვის ქვეყანაში 310 ათასზე მეტი ადამიანია აცრილი.