ამ ეტაპზე საქართველოში ლაბორატორიულად დადასტურებულია დელტა შტამის 72 შემთხვევა. აქედან მხოლოდ წინა კვირას 27 შემთხვევა დადასტურდა. ამის შესახებ საკოორდინაციო საბჭოს სხდომის შემდეგ გახდა ცნობილი.

ამირან გამყრელიძის თქმით, ეს მონაცემები არის ლაბორატორიულად დადასტურებული შემთხვევები, თუმცა, როგორც აღნიშნავს, "ახლა ვფიქრობთ, რომ ქვეყანაში 20%-ზეა მეტია დელტა-შტამის ცირკულაცია და მსოფლიოში მოლოდინია, აგვისტოს შუა რიცხვებიდან მთლიანად ჩაანაცვლებს ბრიტანულ შტამს".

რაც შეეხება ამ პაციენტებში კლინიკურ მიმდინარეობას, როგორც ჯანდაცვის მინისტრის მოადგილე, თამარ გაბუნია აცხადებს, "საყურადღებოა იმ შემთხვევაში, როდესაც პაციენტი ჰოსპიტალში ხვდება".

8 ივლისს, ამირან გამყრელიძემ თქვა, რომ დელტა-შტამის ლაბორატორიულად დადასტურებული 52 შემთხვევა იყო. 25 ივნისს — 20 შემთხვევა.

13 ივლისის მონაცემებით, საქართველოში კორონავირუსის 1 862 ახალი შემთხვევა დადასტურდა, გამოჯანმრთელდა 619, ხოლო გარდაიცვალა — 11 ადამიანი. ამ ეტაპზე ინფიცირების მიმდინარე აქტიური შემთხვევა არის 13 610. პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 379 673-ს, ჯამში გამოჯანმრთელებულთა რაოდენობა გაიზარდა 360 558-მდე, ხოლო ვირუსს ჯამში 5 479 პირი ემსხვერპლა.