ბელგიაში საქართველოს საელჩოსთან აქცია გაიმართა. აქტივისტებმა საელჩოს კარებთან დატოვეს ბანერები, ასევე, წარწერები: "მედიაზე ძალადობა მიუღებელია", "საქართველოში ჟურნალისტებს სცემენ და კლავენ", "არა მოძალადეებს", "საქართველო საფრთხეშია", არა რუსეთის პროპაგანდას", "ადამიანის უფლებები ირღვევა" და ა.შ.

როგორც On.ge-ს აქტივისტმა მონიკა თიგიშვილმა განუცხადა, ბელგიაში მყოფი ქართველი აქტივისტები საქართველოს საელჩოსთან შეიკრიბნენ და გააპროტესტეს ის მოვლენები, რომლებიც 5-6 ივლისს თბილისში განვითარდა.

"ჩვენ გავაპროტესტეთ ის ძალადობრივი ქმედებები, რომელსაც საპატრიარქო და ხელისუფლება ახორციელებს. სახლში ვერ გავჩერდით, რეალურად, რუსთაველზე უნდა ვმდგარიყავით, მაგრამ საქართველოში არ ვართ და ვერ ვახერხებთ, ამიტომ გადავწყვიტეთ, ბრიუსელში, საქართველოს საელჩოსთან გაგვეკეთებინა ეს ყველაფერი", — ამბობს მონიკა თიგიშვილი.