პრემიერმინისტრის, ირაკლი ღარიბაშვილის ფეისბუქგვერდზე კრიტიკული კომენტარების ნაწილს შლიან, მომხმარებლებს კი ბლოკავენ. ინფორმაციას ამის შესახებ თავად ფეისბუქმომხმარებლები ავრცელებენ და პოსტზე დაკვირვებაც აჩვენებს, რომ კომენტარების ნაწილი ქრება.

მას შემდეგ, რაც ღარიბაშვილმა 5 ივლისს ნაცემი ოპერატორის გარდაცვალებაზე სამძიმრის პოსტი გამოაქვეყნა, მას არაერთმა მოქალაქემ შეახსენა თავისი პასუხისმგელობა და ძალადობის წახალისების გამო გააკრიტიკა. ბოლო რამდენიმე საათია ათეულობით ადამიანი პოსტავს, რომ პრემიერმა მსგავსი შინაარსის კომენტარების გამო ისინი დაბლოკა. ამ დროისთვის ღარიბაშვილის პოსტზე არაერთი კრიტიკული კომენტარი რჩება, თუმცა უცნობია რა ბედი ეწევა მათ.

კითხვით, ვინ მართავს ღარიბაშვილის ფეისბუქგვერდს და რატომ შლიან ან ბლოკავენ მოქალაქეებს, On.ge მთავრობის ადმინისტრაციას დაუკავშირდა. პრესსამსახურში გვითხრეს, რომ ინფორმაციას გაარკვევენ და დაგვიკავშირდებიან, თუმცა ჩვენს შემდგომ ზარებს აღარ უპასუხეს.