ტურისტული სააგენტო K ART WELL-ის დამფუძნებელი და გიდი, მინდია ბაჟუნაიშვილი ამბობს რომ 5 ივლისს პოლონელი ტურისტის დაჭრის გამო შვედი ტურისტების ჯგუფმა საქართველოში დაგეგმილ მოგზაურობაზე უარი თქვა.

წერილში, რომელსაც შვედი ტურისტების ჯგუფი ბაჟუნაიშვილს სწერს ვკითხულობთ, რომ თავს იკავებენ საქართველოში მოგზაურობისგან, რადგან შიშობენ, რომ "განსხვავებული სტილის" გამო შეიძლება პრობლემები შეექმნათ.

ფოტო: Facebook: მინდია ბაჟუნაიშვილი

კითხვაზე, ხომ არ უკავშირებს ამ ფაქტს 5-6 ივლისს, ჰომოფობიური და ძალადობრივი ჯგუფების მიერ მოწყობილ აქციას და თავდასხმებს, მინდია გვპასუხობს:

"შესაძლებელია. უბრალოდ დამთხვევა იქნება, მაგრამ ცუდ დროს დაემთხვა და ამით ფაქტია ვიზარალეთ ძალიან ბევრმა. ასევე იმიჯზე აღარაფერს ვამბობ".

მინდია ამბობს, რომ შვედი ტურისტების ჯგუფთან კომუნიკაცია ჯერ კიდევ სექტემბერში დაიწყო და 10 თვე დასჭირდა, რათა ისინი საქართელოში ჩამოსვლაზე დაეთანხმებინა.

"ეს არის ჯგუფი, რომელიც 6 წელია მოგზაურობს სხვადასხვა ქვეყანაში და პოპულარიზაციას უწევს სხვადასხვა ადგილებს. შვედური ტურისტული კომპანიაა, რომლებიც საქართველოს შესასწავლად დავპატიჟე და 10 თვიანი ლოდინის შემდეგ თანხმობა მივიღე. მათ ტური იყიდეს ჩემგან. ჰო იმისთვის, რომ საქართველოში შემდგომში ტურისტები გამოეგზავნათ მათ 14 000 ევროიანი პაკეტი იყიდეს და ამ თანხას ჩვენთან დახარჯავდნენ. 4 აგვისტოს ჩამოვიდოდნენ რომ არა გადარეული ორკები რუსთაველზე", — წერს მინდია საკუთარ ფეისბუქგვერდზე.

მისი ინფორმაციით, ამ ტურის გაუქმებით მასთან ერთად იზარალა კიდევ ორმა გიდმა, ორმა მძღოლმა, ოთხმა სასტუმრომ, ექვსმა მუზეუმმა და რვა რესტორანმა, სადაც შვედი ტურისტების ვიზიტი უკვე დაგეგმილი იყო. საქართველოში გაუქმებული ტურის შემდეგ ისინი თურქეთში მოგზაურობას გეგმავენ, თუმცა, მინდია მათთან კომუნიკაციას ისევ ცდილობს და იმედი აქვს, რომ აზრს შეიცვლიან.

"დღეს მივწერე კიდევ ერთხელ ჯონს და ველოდები პასუხს. აქვე, რამდენიმე ადამიანმა შემომთავაზა დახმარება. სავარაუდოდ რაიმე პაკეტს შევთავაზებთ ამ ჯგუფს. ახლა უბრალოდ თავს არ მოვაბეზრებ. თან გადაიაროს ამ დაძაბულობამ", — უთხრა მინდიამ On.ge-ს.

ტურისტული სააგენტო მუშაობას არგძელებს. მაგალითად, 6 აგვისტოს ელოდებიან სტუმრებს ჩეხეთიდან. მინდია ფიქრობს, რომ "განსხვავებული სტილის" ტურისტების ჩამოსვლა საქართველოში საშიში არ არის და ეს განცდა ბოლო დღეებში განვითარებული მოვლენების ფონზე გაჩნდა.

5 ივლისს, თბილისში, ხეთაგუროვის ქუჩაზე პოლონელი ტურისტი დაჭრე. თვითმხილველმა On.ge-ს უთხრა, რომ დაპირისპირების მიზეზი ტურისტის მიერ საყურის ტარება გახდა. მოგვიანებით, შსს-მ გაავრცელა განაცხადა, რომ ბრალდებულს, რომელსაც ამჟამად აღკვეთის ღონისიძიების სახით პატიმრობა აქვს შეფარდებული, ფსიქიკური ჯანმრთელობის პორბლემები აქვს. შინაგან საქმეთა მინისტრის მოადგილემ, ალექსანდრე დარახველიძემ გამორიცხა, რომ ტურისტის დაჭრა შესაძლოა ამავე დღეს დაგეგმილ ღირსების მარშთან ყოფილიყო დაკავშირებული.

ღირსების მარშის საწინააღმდეგოდ, ჰომოფობიურმა და ძალადობრივმა ჯგუფებმა აქციები გამართეს. 5-6 ივლისს ჯამში 50-ზე მეტ ჟურნალისტს, სამოქალაქო მოძრაობების ოფისებსა და მშვიდობიან მოქალაქეებს დაესხნენ თავს. ამ მოვლენების გამო სამოქალაქო საზოგადოებისა და ოპოზიციის ნაწილი შინაგან საქმეთა მინისტრის პასუხისმგებლობის საკითხის დაყენებას ითხოვს, რადგან მიაჩნიათ, რომ მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.