ქართული ოცნების გენერალური მდივანი, კახა კალაძე მოძალადე ჯგუფებს, რომლებიც ქალაქში გადაადგილდებიან და ჟურნალისტებს, სამოქალაქო მოძრაობების ოფისებსა და მოქალაქეებს თავს ესხმიან, სიმშვიდისკენ მოუწოდებს. კალაძეს არაფერი უთქვამს ძალადობის აღკვეთაზე შინაგან საქმეთა სამინისტროს პასუხისმგებლობაზე.

"მეგობრებო, თანამოქალაქენო, მოგიწოდებთ ყველას სიმშვიდისკენ! დაუშვებელია ძალადობა! წარმოუდგენელი ფაქტები ფიქსირდება, თავდასხმები მოზარდებზე, ქალებზე, ტურისტებზეც კი.

ჩვენ გვიყურებს საქართველოს მტერიც და მოყვარეც. დაუშვებელია ასე სირბილი ქუჩებში, დაუშვებელია აგრესია. გაითვალისწინეთ ყველამ და გაუფრთხილდით ჟურნალისტებს.

მედია მსოფლიოს ცხელ წერტილებშიც კი ხელშეუხებელია. ჩვენი საზოგადოების სირცხვილია ჟურნალისტების მიმართ გამოხატული უმართავი აგრესია. მიეცით მათ მუშაობის საშუალება", — წერს კალაძე საკუთარ ფეისბუქგვერდზე.

სახალხო დამცველმა დღეს განაცხადა, რომ ძალადობრივი აქციის მონაწილეები ქალაქის ქუჩებში გადაადგილდებიან და თავს ესხმიან როგორც ჟურნალისტებს, ისე მოქალაქეებს.

"ჩემი ინფორმაციით, მოძალადე ჯგუფები კორპუს-კორპუს, სადარბაზო-სადარბაზო დასდევენ ადამიანებს, ქუჩაში უსწორდებიან ჟურნალისტებს, ასევე ადამიანებს, რომლებსაც ცნობენ და აღიქვამენ როგორც მხარდამჭერებად ლგბტ თემის. დღეს, მიუხედავად იმისა, რომ პრაიდმა გააუქმა დაანონსებული მარში, ეს ადამიანები არიან სერიოზული საფრთხის ქვეშ. მოვუწოდებ პოლიციას, რომ უზრუნველყოს თითოეული ამ ადამიანის უსაფრთხოება", — განაცხადა ნინო ლომჯარიამ.

სახალხო დამცველი მოუწოდებს შინაგან საქმეთა სამინისტროს უზრუნველყოს ყველა ადამიანის უსაფრთხოება. ლომჯარიას შეფასებით უწყება სიტუაციას ვერ აკონტროლებს და მოქალაქეების სიცოცხლე და ჯანმრთელობა რეალური საფრთხის წინაშეა.

ამ დრომდე პოლიციას არცერთი მოძალადე არ დაუკავებია.

გაიგე მეტი: