ჩრდილოეთ ამერიკის ეპარქიის მღვდელმთავარი, საბა ინწკირველი ამბობს, რომ ქრისტეს და ეკლესიის სახელით ადამიანებზე ძალადობა მიუღებელია. ამის შესახებ მან ქადაგების დროს ისაუბრა.

"ეკლესია ვერასდროს იქნება ცოდვის შემწყნარებელი და ჩვენ ვამბობთ, ჩვენ არ გვძულს ადამიანები, მაგრამ როგორც მამა საკუთარ შვილებს, ისე ვეფერებით სიყვარულით სხვა ადამიანებს და მივუთითებთ სწორი გზისკენ. არის მეორე მხარე, ქრისტეს სახელით და ეკლესიის სახელით ხდება ადამიანების მიმართ ძალადობა, შეურაცხყოფა და ეს არის მიუღებელი. ეს აცდენილია ქრისტეს და სახარების სწავლებას.

[...] სახელმწიფოს კანონები და ეკლესიის კანონები ვერ იქნება ერთი და იგივე. სახელმწიფო ვალდებულია დაიცვას თითოეული თავისი მოქალაქე და უზრუნველყოს მისი უფლებები, რომელიც არის კონსტიტუციის მიერ მინიჭებული. ხოლო ეკლესია, არ არის ამსოფლიური, არ ზრუნავს ამსოფლიური ცხოვრებისთვის, არამედ ზრუნავს ზეციური ცხოვრებისთვის", — განაცხადა მეუფე საბამ.

პირველ ივლისს თბილისი პრაიდის კვირეული დაიწყო. უკვე გაიმართა ფილმის ჩვენება და თბილისი პრაიდ ფესტივალი. ორივე ღონისძიებაზე მობილიზებული იყვნენ ჰომოფობიური და ძალადობრივი ჯგუფები, რომლებიც აგრესიულად იყვნენ განწყობილნი და ღონისძიებების ჩაშლას ცდილობდნენ, თუმცა პოლიციამ მათ ამის საშუალება არ მისცა.

თბილისი პრაიდის კვირეული 5 ივლისს ღირსების მარშით დასრულდება. ამ დღეს მობილიზებაც აპირებენ ძალადობრივი ჯგუფები. გარდა ამისა, მარშის საწინააღმდეგო აქცია დაგეგმა საპატრიარქომაც.

საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.