ამბროლაურის მუნიციპალიტეტის საკრებულოს ფრაქცია ერთობის თავმჯდომარე განსაკუთრებით დიდი ოდენობით ქრთამის აღების ბრალდებით დააკავეს. დაკავების შესახებ ინფორმაციას სახელმწიფო უსაფრთხოების სამსახური ავრცელებს. თუმცა, დაკავებულის ვინაობა და ფრაქცია არ არის დაკონკრეტებული.

"როგორც გამოძიებით დგინდება, საკრებულოს წევრმა დაარწმუნა მოქალაქე, რომ თბილისის მუნიციპალიტეტის მერიის შესაბამისი სამსახურის თანამშრომელთა მეშვეობით უზრუნველყოფდა ქ.თბილისში მდებარე მიწის ნაკვეთზე სამშენებლო კოეფიციენტის გაზრდას, რაშიც ქრთამის სახით 140 000 აშშ დოლარის გადახდა მოსთხოვა. 2021 წლის 29 ივნისს მან მოქალაქეს წინასწარ გამოართვა ქრთამის სახით მოთხოვნილი თანხის ნაწილი — 30 000 აშშ დოლარი, რა დროსაც ის დააკავეს", — ნათქვამია ინფორმაციაში.

On.ge-ს ინფორმაციით, დაკავებული ფრაქცია ერთობის თავმჯდომარე გივი ქურციკიძეა, რომელიც საკრებულოში პატრიოტთა ალიანსის სიით არის გასული. ინფორმაციას ამბროლაურის საკრებულოში ადასტურებენ.

გამოძიება განსაკუთრებით დიდი ოდენობით ქრთამის აღებაზე მიმდინარეობს.