ოპოზიციის ნაწილმა პარლამენტში იურიდიულ საკითხთა კომიტეტის სხდომა პროტესტის ნიშნად დატოვა. სხდომაზე უზენაესი სასამართლოს მოსამართლეთა დანიშვნის საკითხი განიხილებოდა.

როგორც სხდომის დატოვების შემდეგ, დეპუტატმა ანა ნაცვლიშვილმა განაცხადა, ოპოზიცია მოითხოვს, რომ რეფორმების სამუშაო ჯგუფი შეიქმნას, ხოლო მანამდე მოსამართლეთა დანიშვნის პროცესი შეჩერდეს.

"უმრავლესობა აპირებს, შექმნას სამუშაო ჯგუფი, რათა შეამოწმოს არალეგიტიმურად წარმოდგენილი კანდიდატები, შესაბამისი დოკუმენტაცია აქვთ თუ არა პარლამენტში გამოგზავნილი. ჩვენ ამ ფარს პროცესში შესვლას არ ვგეგმავთ. ჩვენ მოვითხოვთ, რომ შეიქმნას რეფორმის სამუშაო ჯგუფი ზუსტად ისე, როგორც ეს არის გათვალისწინებული შარლ მიშელის შეთანხმებით და მანამდე დანიშვნების პროცესი შეჩერდეს", — განაცხადა ნაცვლიშვილმა.

მისივე თქმით, ეს არის ვალდებულება, რომელიც ქართულმა ოცნებამ აიღო, ამიტომ კიდევ ერთხელ მოუწოდეს, რომ პარლამენტში ეს პროცესი არ უნდა გაგრძელდეს.

"ამაზე ორაზროვანი განმარტებები არის წარმოუდგენელი, რადგან ამაზე შარლ მიშელის შეთანხმებაშიც და მის საფუძველზე ვენეციის კომისიის დასკვნაშიც ცალსახად წერია, რომ პარლამენტმა პროცესი არ უნდა გააგრძელოს. ეს არის ვალდებულება, რომელიც აიღო ქართულმა ოცნებამ და კიდევ ერთხელ მოვუწოდეთ ხელისუფლებას და გავაგონეთ ჩვენი ხმა, რომ ამ შეთანხმებას არავინ კითხულობს ისე, როგორც ქართული ოცნება. ისხდნენ ახლა ამ დარბაზში მარტო და გადაწყვიტონ, სამუშაო ჯგუფი სამ კაციანი შექმნან, თუ სამ ნახევარი", — თქვა მან.

17 ივნისს იუსტიციის უმაღლესი საბჭოს სხდომაზე მოსამართლეობის კანდიდატთა შესარჩევი კონკურსის კენჭისყრა გაიმართა, სადაც თანამდებობაზე 46 მოსამართლე დაინიშნა. გარდა ამისა, საბჭო პარლამენტს უზენაესი სასამართლოს მოსამართლეობის 9 კანდიდატს წარუდგენს.

არასამთავრობო ორგანიზაციების განცხადებით, იუსტიციის უმაღლესი საბჭო აგრძელებს მართლმსაჯულებისთვის დამაზიანებელი ნაბიჯების გადადგმას. ორგანიზაციები აღნიშნავენ, რომ მოსამართლეების სიმცირე მნიშვნელოვანი პრობლემაა, თუმცა ახლა კადრების დამატება სასამართლოში არსებული ძლიერი ე.წ. კლანური მმართველობის პირობებში მიმდინარეობს. ამ თემაზე კრიტიკული განცხადებები ჰქონდათ საერთაშორისო პარტნიორებსაც, ისინი მმართველ გუნდს შეთანხმების პირობების შესრულებისკენ მოუწოდებენ.

გაიგეთ მეტი: