საქართველოს იმ მოქალაქეებს, რომლებიც გერმანიაში სეზონური დასაქმების პროგრამაში მონაწილეობენ და რომელთა დამსაქმებელმაც დაარღვია პროგრამით გათვალისწინებული პირობები, ამ კვირაში ახალ დამსაქმებელთან გადაიყვანენ. ინფორმაციას ამის შესახებ გერმანიის საელჩო ავრცელებს.

როგორც საელჩო აცხადებს პირველი შრომითი ურთიერთობიდან გამომდინარე მათი უფლებები და მოთხოვნები ძალაში რჩება.

გერმანიის დასაქმების ფედერალური სააგენტო წუხილს გამოთქვამს ამ პრობლემასთან დაკავშირებით:

"ეს პრობლემა სამწუხარო ცალკეულ შემთხვევას წარმოადგენს. გერმანიის სახელმწიფო უწყებებმა სწრაფად და ეფექტიანად გამოიკვლიეს აღნიშნული შემთხვევა და მიიღეს შესაბამისი ზომები. სეზონურად მომუშავე პირებისთვის დასაქმების კარგი პირობების შექმნა მთავარი წინაპირობაა საშუამავლო შეთანხმების წარმატებით განხორციელებისთვის".

გერმანიაში დასაქმებული ქართველების სამუშაო პირობებზე რამდენიმე დღის წინ სიუჟეტი გააკეთა ტელეკომპანია ფორმულამ. დასაქმებულები ყვებოდნენ გაუსაძლის საცხოვრებელ პირობებზე, მოუწესრიგებელ ოთახებსა და სველ წერტილებზე. ასევე, ამბობდნენ, რომ დამსაქმებელი კუთვნილ ანაზღაურებას არ აძლევდათ.