გერმანია ევროკავშირის არაწევრი ქვეყნების სრულად ვაქცინირებული მოგზაურებისთვის 25 ივნისიდან საზღვრებს ხსნის. ამის შესახებ ინფორმაციას გერმანიის შინაგან საქმეთა ფედერალური სამინისტრო ავრცელებს.

გერმანიის ხელისუფლების გადაწყვეტილებით, მოქალაქეებს ვაქცინის საბოლოო დოზა ქვეყანაში შესვლამდე 14 დღით ადრე მაინც უნდა ჰქონდეთ მიღებული. ვაქცინა ევროპის სამედიცინო სააგენტოს (EMA) მიერ უნდა იყოს აღიარებული.

ცნობისთვის, EMA-ს მიერ ამ ეტაპზე აღიარებულია Pfizer-ის, Moderna-ს AstraZeneca-ს და Janssen-ის ვაქცინები. ეს კი იმას ნიშნავს, რომ საქართველოში ჩინური ვაქცინით აცრილი მოსახლეობა გერმანიაში ტურისტული მიზნით ჯერჯერობით ვერ შევა, რადგან ეს ვაქცინები ევროპის სამედიცინო სააგენტოს მიერ ჯერ არ არის აღიარებული.

ამ პირობების დაკმაყოფილების შემთხვევაში, გერმანიაში შესვლა ყოველგვარი ოფიციალური და სამედიცინო მიზეზეზების გარეშე იქნება შესაძლებელი. თუმცა, ქვეყანაში არ დაიშვებიან მოგზაურები იმ ქვეყნებიდან, სადაც ვირუსის ახალი შტამების გამო, კორონავირუსის გავრცელების ტემპი მაღალია. მათ შორის, ეს შეზღუდვა ეხება დიდი ბრიტანეთის, ინდოეთის, ბრაზილიის მოქალაქეებს, სადაც ამ ეტაპზე ვურუსის გავრცელების მაღალი მაჩვენებლებია.

გერმანიამ საზღვრების გახსნის გადაწყვეტილება ქვეყანაში კოვიდინფიცირებულთა შემთხვევების მკვეთრი კლების ფონზე მიიღო.