საპარლამენტო უმცირესობა ევროპული საქართველო რუსთავი 2-ის მხარდამჭერ აქციას შეუერთდა. პარტიის ერთ-ერთი ლიდერის, ირმა ნადირაშვილის თქმით, მან რუსთავი 2-ში მუშაობა 23 წლის წინ დაიწყო და არხს ყოველწლიურად უხდებოდა თავისი პოზიციების დაცვა.

"ვერცერთმა ხელისუფლებამ ვერ ისწავლა, რომ მედიას არ უნდა ეჭიდაო. დღევანდელი ხელისუფლების საღი აზრის იმედი არ მაქვს, მაგრამ იქნებ გაიგონ, რომ ესაა ნაღმი, რომელზეც თავად აფეთქდებიან" - აცხადებს ელენე ხოშტარია.

პარტიის ერთ-ერთი ლიდერი გიგა ბოკერია ამბობს, რომ ბიძინა ივანიშვილმა და მისმა გუნდმა ქვეყანას ზიანი მიაყენა და თუ ეს საქმეც ხალვაშის სასარგებლოდ დასრულდება, ეს ზიანი კიდევ უფრო გაიზრდება.

"გადაჭარბების გარეშე, საკვანძო მომენტია, ბიძინა ივანიშვილმა და მისმა გუნდმა ქვეყანას ზიანი მიაყენა და თუ ამ საქმეშიც თავისას გაიტანს, ეს ზიანი ხარისხობრივად კიდე უფრო გაიზრდება. საქმე არაა მხოლოდ რუსთავი 2-ში ან მის სარედაქციო პოზიციაში, თუ ერთ კაცს აქვს სხვა პოლიტიკურ ინსტიტუტებთან სრული კონტროლი მედიასივრცის, ეს ძალიან ცუდ გზაზე აყენებს ქვეყანას, მარტო დემოკრატიას კი არა, უსაფრთხოებას და ამ ინსტიტუტებს. ამიტომ, ჩვენს მოქალაქეებს იმედია ესმით, რომ ეს არაა რომელიმე არხის მიმართ სიმპათიის გამოხატვის პროტესტი, მითუმეტეს პარტიის მიმართ, ესაა არჩევანი, რომელიც ჩვენი შვილების მომავალს მეტ ან ნაკლებ საფრთხეში ჩააგდებს, ამიტომაა დღევანდელი დღე და ეს მოვლენა საკვანძო".

ტელეკომპანია რუსთავი 2-ის მხარდასაჭერი აქციის მონაწილეები საქართველოს უზენაესი სასამართლოს შენობასთან შეიკრიბნენ. სასამართლოს დიდი პალატა დღეს ტელეკომპანიის საქმეზე იწყებს მსჯელობას.