თავისუფალი დემოკრატების ლიდერი ნინო გოგუაძე მიიჩნევს, რომ რუსთავი 2-ის სასამართლო დავა პოლიტიკური პროცესია. მისი თქმით, ამ საქმეში ყველა ფუნდამენტური ღირებულება აირია, მათ შორის კერძო საკუთრების უფლება და სიტყვის თავისუფლება. ამის შესახებ ნინო გოგუაძემ On.ge-ს ტელეკომპანია რუსთავი 2-ის მხარდამჭერ აქციაზე, საქართველოს უზენაესს სასამართლოსთან განუცხადა.

"ჩვენ, თავისუფალი დემოკრატები ყოველთვის ვართ პრინციპულები ღირებულებების დაცვაში. ვიცავთ, როდესაც ვართ ოპოზიციაში და ვიცავდით, როდესაც ვიყავით ხელისუფლებაში. რუსთავი 2, ეს არის ხელისუფლებისგან დამოუკიდებელი მედია და ეს ნიშნავს ღირებულებას, რადგან სიტყვის თავისუფლება სწორედ ხელისუფლებისგან დამოუკიდებლობაზე გადის," - უთხრა On.ge-ს ნინო გოგუაძემ.

მისი აზრით, იმ შემთხვევაში, თუ არ იქნება რუსთავი 2 ქვეყანაში კრიტიკული აზრის გამოხატვა შეიზღუდება, რომელიც დემოკრატიული სახელმწიფოს ღირებულებაა.

"ეს არია ავტორიტარული, ტოტალიტარული სახელმწიფოს შენების გზა. ამიტომ ჩვენ ვიცავთ სახელმწიფოს დემოკრატიულ პერსპექტივას," - დასძინა გოგუაძემ.

ტელეკომპანია რუსთავი 2-ის მხარდასაჭერი აქციის მონაწილეებმა საქართველოს უზენაესი სასამართლოს შენობასთან შეკრება უკვე დაიწყეს. სასამართლოს დიდი პალატა დღეს ტელეკომპანიის საქმეზე იწყებს მსჯელობას.