საპატრიარქოს საზოგადოებასთან ურთიერთობის ხელმძღვანელის, ანდრია ჯაღმაიძის განცხადებით, ნინოწმინდის პანსიონზე ჯერ საგამოძიებო უწყებებმა უნდა გამოიძიონ, რა და როდის ხდება. მისი თქმით, ტელევიზიებთან ბავშები 5-10 წლის წინანდელ ამბებს ჰყვებიან, რა დროსაც "არანაირი სტანდარტი არ იყო" და "სახლშიც ასე ზრდიდნენ ბავშვებს, ძალიან ხშირად ფიზიკური ზემოქმედების ქვეშ". გარდა ამისა, ჯაღმაიძე ავითარებს აზრს, რომ ბავშვები თბილისში გადმოსვლის მიზნით ჰყვებიან ამ ისტორიებს. ამის შესახებ მან TV პირველის ეთერში ისაუბრა.

"არის ტყუილი და მართალი ერთმანეთში არეული. იმის გამო კი არა, რომ ვიღაცას უნდა მოტყუება, არამედ იქ არის ძალიან ბევრი გარემოება. წარმოიდგინეთ, თინეიჯერი ბავშვი ნინოწმინდის პანსიონში ცხოვრობს და იყურება წინ, აქვს მას ინტერნეტი, ხედავს რა ხდება, ახალგაზრდები როგორ ცხოვრობენ და მას ეძლევა შანსი, რომ ილაპარაკოს რაღაცაზე, რაც მას მისცემს გარანტიას, რომ თბილისში გადმოვა, დედაქალში და მიეცემა მას სწავლის გაგრძელების საშუალება.

რა თქმა უნდა, ჰყვება ეს ადამიანი, იქვე ამბობს, რომ 10-5 წლის წინანდელ ამბებს ჰყვება. მაგრამ, შეიძლება, უახლოეს წარსულშიც მეორდება რაღაცები. ეს სულ ყველაფერი გამოძიების საკითხია, კარგად უნდა გამოვიძიოთ, რა ხდება, როდის ხდება. 10 წლის წინ არანაირი სტანდარტი არ იყო, ჩვენ უნდა ვიცოდეთ და სახლშიც ასე ზრდიდნენ ბავშებს ძალიან ხშირად ფიზიკური ზემოქმედების ქვეშ. დღეს ეს ვისწავლოთ ჩვენ და ვსწავლობთ თანდათან, რომ სხვა მეთოდებიც არსებობს ბავშვთან ურთიერთობის და სხვანაირად არის საჭირო მიდგომა", — განაცხადა მან.

სპირიდონი ნინოწმინდის პანსიონის ხელმძღვანელი აღარ არის, ის იაკობმა შეცვალა. ბოლო ინფორმაციით, პანსიონიდან 30 ბავშვია გაყვანილი და ადგილზე 23 ბავშვი რჩება.