თუ ჰოლივუდში მოღვაწე კრისების გარჩევა ერთმანეთისგან გიჭირს, კრის ჰემსვორტის ინსტაგრამ პოსტი ვერაფერში დაგეხმარება. ჰემსვორტმა გადაწყვიტა, თავისი კოლეგა კრის ევანსი, რომელთან ერთადაც Avengers-ში თამაშობს, დაეტროლა და მეორმოცე დაბადების დღე სულ სხვა კრისის ფოტოთი მიელოცა.

"მეორმოცე დაბადების დღეს გილოცავ, კრის ევანს. ჩემთვის მუდამ ნომერ პირველი ადამიანი იქნები", — წერს კრის ჰემსვორტი ფოტოზე, რომელზეც ის კრის პრატთან ერთადაა.

ფოტო მარველის ახალი ფილმის Thor: Love And Thunder-ის გადასაღები მოედნიდანაა, რომლის პრემიერაც 2022 წელსაა დაგეგმილი.

ფოტომ და ჰემსვორტის წარწერამ გულშემატკივრების სახალისო რეაქციები გამოიწვია. ზოგიერთმა სამყაროს კიდევ უფრო დასაბნევად სამეულისთვის მეოთხე კრისის — კრის პაინის დამატებაც კი მოითხოვა.

აშშ-ში ერთხელ უკვე ჩატარდა ჯოშების ბრძოლა. საინტერესოა, როდის ვიხილავთ კრისების ბრძოლას, რომელიც სამყაროს საუკეთესო კრისს ერთხელ და სამუდამოდ გამოავლენს?