საერთაშორისო გამჭვირვალობა — საქართველო მთავრობასა და პარლამენტის ახალ შემადგენლობას მოუწოდებს დაიწყოს მუშაობა კორუფციის წინააღმდეგ სისტემურ და რეალურ რეფორმაზე, რაც დამოუკიდებელი ანტიკორუფციული სააგენტოს ჩამოყალიბებას და კორუფციის ცალკეული გამოვლინებების წინააღმდეგ ქმედითი მექანიზმების შექმნას გულისხმობს.

"ბოლო პერიოდში პოლიტიკური დისკუსიების დროს აქტუალური გახდა ნეპოტიზმისა და კორუფციის საკითხები. განვითარებული მოვლენები მიუთითებს იმ სამწუხარო რეალობაზეც, რომლის დროსაც პოლიტიკოსები მხოლოდ მაღალი თანამდებობების დატოვების შემდეგ საუბრობენ მწვავედ კორუფციის პრობლემებზე, რომლის პრევენცია და მასთან გამკლავება სწორედ მათ მოვალეობას წარმოადგენდა. მიუხედავად იმისა, რომ სამოქალაქო სექტორი და კრიტიკული მედია საშუალებები წლებია საუბრობენ კორუფციის კონკრეტულ ფაქტებსა და ტენდენციებზე, ისევე როგორც ამ პრობლემებთან ბრძოლის სისტემურ გზებზე, საქართველოს მთავრობის მხრიდან არ გადადგმულა სისტემური ნაბიჯები კორუფციის წინააღმდეგ. სამთავრობო სარედაქციო პოლიტიკის მქონე მედიებში ოცნების ყოფილი გუნდის წევრებზე გავრცელებული ინფორმაცია კიდევ ერთხელ მიუთითებს, რომ ნეპოტიზმის ის შემთხვევები, რომლებიც საჯარო დისკუსიის საგანი ხდება, ზღვაში წვეთია პრობლემის რეალურ მასშტაბთან შედარებით", — აცხადებენ ორგანიზაციაში.

მათივე თქმით, ნეპოტიზმი, როგორც კორუფციის გამოვლინება, უკიდურესად გავრცელებულია ქვეყნის საჯარო სამსახურში.