გიორგი გახარია, რომელიც მთავრობაში ყოფნისას ამბობდა, რომ მწერალ ზვიად რატიანის საქმეზე განვითარებულ მოვლენებს არ ნანობს, ახლა საპირისპიროს ამბობს. მისი თქმით, ამ საკითხზე პასუხისმგებლობას გრძნობს. ჟურნალისტის რეპლიკაზე, "ნანობთ ამ კადრების ამბავს?", გახარია პასუხობს: "დიახ".

"პოლიცისთვის წინააღმდეგობის გაწევა, მიუხედავად იმისა, შენ პოეტი ხარ, მწერალი ხარ, რიგითი მოქალაქე, ჩინოვნიკი, ეს პრობლემაა და ამაზე ადამიანმა პასუხი უნდა აგოს. თუმცა, რა თქმა უნდა, აქ იყო მეორე მდგენელი, როდესაც გარკვეული ფირები გავრცელდა და ამასთან დაკავშირებით, რა თქმა უნდა, პასუხისმგებლობას ვგრძნობ. ეს იყო არასწორი, არაეთიკური მოვლენა, რომელიც არ უნდა მომხდარიყო და მე ამაზე უნდა მეზრუნა, როგორც შინაგან საქმეთა მინისტრს", — განაცხადა გახარიამ TV პირველის ეთერში.

თუმცა ამავე ეთერში 2019 წლის 22 მარტს რატიანის საქმის შეფასებისას გახარია ამბობდა, რომ არცერთი წუთით ნანობს იმას, რაც მოხდა. ჟურნალისტის დამაზუსტებელ კითხვაზე, რას არ ნანობს მინისტრი, გახარიამ უპასუხა, რომ გატარებულ ღონისძიებებზე საუბრობდა.

"არცერთი წუთით იმაზე, რაც მოხდა მაშინ, არ ვნანობ. იმიტომ, რომ ჩვენ მოქალაქეები ვართ და ჩვენი პასუხისმგებლობა გვაკისრია ყველგან, ნასვამები ვართ, ქუჩაში ვართ თუ სადა ვართ და რას ვამბობთ იმაზეც. [...]

პოლიციას აქვს ლეგიტიმური უფლება ძალადობის და ეს არის მისი კონსტიტუციური უფლება, კანონმდებლობით დადგენილი. სხვანაირად სახელმწიფოში წესრიგი ვერ დამყარდება", — განაცხადა შინაგან საქმეთა მინისტრმა.

მაშინ ჟურნალისტის კითხვაზე, არის თუ არა სამინისტროს დანაშაული ის, რომ რატიანის კადრები გავრცელდა და მას ზეწოლის გამო ქვეყნის დატოვება მოუწია, გახარია პასუხობდა, რომ ცუდია, თუ რატიანს ქვეყნის დატოვება მოუწია, მაგრამ მან დანაშაული ჩაიდინა, რაც სასამართლომაც დაადგინა.

"რა ქნას იმ პოლიციელმა, რომელიც ასევე იყო ნაჩვენები და რომელსაც ამ ადამიანმა პირდაპირ ეთერში, ქალაქის ცენტრში მიაყენა შეურაცხყოფა, არ მინდა ახლა იმ სიტყვების გამეორება. ამ ადამიანის უფლებებს თქვენ არ იცავთ?" — ჰკითხა მინისტრმა ჟურნალისტებს.

ზვიად რატიანის საქმე

პოეტი ზვიად რატიანი ე.წ. რეიდების დროს დააკავეს. მას სამართალდამცავები წინააღმდეგობის გაწევასა და წვრილმან ხულიგნობას ედავებოდნენ. რატიანი კი პოლიციელებს ცემაში ადანაშაულებს. საბოლოოდ, სასამართლომ მას 2 000-ლარიანი ჯარიმა დააკისრა.

საზოგადოებრივმა მაუწყებელმა 2017 წლის 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეოკადრები. საზოგადოებრივმა მასალა ისე მიაწოდა მომხმარებელს, რომ არ დაუზუსტებია, რომ აღნიშნული ვიდეო არა პოლიციის სამხრე კამერით, არამედ ტელეფონითაა გადაღებული, დამონტაჟებულია და არ ასახავს ინციდენტს სრულად.

ჩანაწერის გამოქვეყნების შემდეგ, მწერლებისა და გამომცემლების ჯგუფი საზოგადოებრივი მაუწყებლის სამეურვეო საბჭოს შეხვდა და მენეჯმენტის გათავისუფლება მოსთხოვა.

საზოგადოებრივმა მაუწყებლის თვთრეგულირების მექანიზმის სააპელაციო საბჭომ პირველ მარტს რატიანის ვიდეოს მათ ეთერში გავრცელების საკითხი განიხილა და პერსონალური მონაცემების დარღვევა ვერ დაინახა.

2018 წლის 2 მარტს პერსონალურ მონაცემთა დაცვის ინსპექტორმა პოეტ ზვიად რატიანის ვიდეოს გასაჯაროების გამო შინაგან საქმეთა სამინისტრო სამართალდამრღვევად სცნო და 2 000 ლარით დააჯარიმა.

რატიანმა ინციდენტის შემდეგ ქვეყანა დატოვა. რატიანმა შინაგან საქმეთა სამინისტროს მხრიდან მორალური ზიანის ანაზღაურების მოთხოვნით სასამართლოს მიმართა.