ჯანდაცვის მინისტრის მოადგილის, თამარ გაბუნიას განცხადებით, ამ თვეში კომენდანტის საათის მოხსნაზე "მაინც სიფრთხილე" მართებთ. მისი თქმით, უნდა იყოს კორონავირუსის შემთხვევების უფრო აქტიური და სტაბილური კლება.

"ჯერჯერობით უნდა დავაკვირდეთ ეპიდემიურ სიტუაციას, რა თქმა უნდა, ამ საკითხზე მუშაობა მიმდინარეობს. შევხედავთ მომდევნო ორი კვირის განმავლობაში ეპიდემიური სურათი როგორ განვითარდება, ამასთან ერთად როგორც ვხედავთ, ვაქცინირებულების რაოდენობა იმატებს და ეს ბალანსი მოგვცემს იმის საშუალებას, რამდენად გვექნება რესურსი. ჯერჯერობით, ამ თვეში მაინც სიფრთხილე გვმართებს, უნდა ვნახოთ სტაბილური, უფრო აქტიური კლება. უნდა დავაკვირდეთ, წინასწარ ამის დაანონსება ცოტა რთულია", — განაცხადა გაბუნიამ.

პირველი ივნისიდან კომენდანტის საათი 23:00 საათიდან 04:00 საათამდე მოქმედებს. მანამდე ის 17 მაისს 23:00 საათამდე გადასწიეს. აქამდე კომენდანტის საათის საღამოს 21:00 საათიდან დილის 05:00 საათამდე მოქმედებდა. ეს ერთადერთი შეზღუდვაა, რომელიც მეორედ დაწესების შემდეგ, არც წინა და არც მოქმედ სამთავრობო გუნდს არ მოუხსნია და უკვე 6 თვეზე მეტია, რაც მოქმედებს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: