საქართველოს პარლამენტის წევრის, სალომე სამადაშვილის განცხადებით, მისთვის გაუგებარი რჩება ნაციონალური მოძრაობის გადაწყვეტილება, ხელი არ მოაწერონ დოკუმენტს. სამადაშვილის თქმით, პოლიტიკურ ლოგიკას მოკლებულია, პარტიამ პარლამენტში გააგრძელოს საქმიანობა და უარი თქვას შარლ მიშელის დოკუმენტის ხელმოწერაზე.

"კარგია, რომ ნაციონალურმა მოძრაობამ მიიღო გადაწყვეტილება პარლამენტში შემოსვლის შესახებ, თუმცა მიმაჩნია, რომ ასევე სწორი იქნება მათი მხრიდან შეთანხმების ხელმოწერა. მე მინდა, საზოგადოებას შევახსენო — ოპოზიციამ გადაწყვეტილება პარლამენტში საქმიანობის გაგრძელების შესახებ მიიღო სწორედ აღნიშნული შეთანხმების საფუძველზე.

ამიტომ ჩემთვის პირადად, პოლიტიკურ ლოგიკას არის მოკლებული, პარლამენტში გააგრძელოს საქმიანობა პარტიამ და უარი თქვას მიშელის დოკუმენტის ხელმოწერაზე, განსაკუთრებით მაშინ, როცა ვხედავთ, რომ მიშელის დოკუმენტის შეთანხმება დღეს მიაჩნიათ სტრატეგიულად მნიშვნელოვან ამოცანად ჩვენს მოკავშირეებს, როგორც აშშ-ს, ასევე, ევროკავშირს", — განაცხადა მან.

სამადაშვილის თქმით, ახლა მნიშვნელოვანია, რომ ოპოზიციური ძალების ძალისხმევა მიმართული იყოს ამ პარლამენტში მიშელის გეგმის შესრულებისკენ. ამიტომ მისი განცხადებით, მიესალმება ენმ-ს გადაწყვეტილებას შესულიყო პარლამენტში, მაგრამ გაუგებარს უწოდებს იმას, რომ დოკუმენტზე ხელს არ აწერენ.

დღეს, 8 ივნისს ნაციონალური მოძრაობა პარლამენტში პირველად მივა. 30 მაისს პარტიამ საკანონმდებლო ორგანოში შესვლის გადაწყვეტილება მიიღო. მიუხედავად ამისა, პარტია შარლ მიშელის დოკუმენტს ხელს არ მოაწერს. გადაწყვეტილება პოლიტსაბჭოს შემდეგ გახდა ცნობილი. იმავე დღეს საქართველოში ევროკავშირისა და ამერიკის შეერთებული შტატების საელჩოებმა განცხადება გაავრცელეს, სადაც აღნიშნეს, რომ ნაციონალური მოძრაობის პარლამენტში შესვლის გადაწყვეტილებას მიესალმებიან, მაგრამ წუხან ევროპული საბჭოს პრეზიდენტის, შარლ მიშელის დოკუმენტზე ხელის არმოწერის გამო.