საქართველოს ყოფილი პრემიერმინისტრი და პარტია საქართველოსთვის თავმჯდომარე, გიორგი გახარია აცხადებს, რომ, მაგალითად, მისთვის პოლიტიკურ პარტიებს შორის შეთანხმების საგნად ამნისტია კატეგორიულად მიუღებელია.

"ჩემთვის მაგალითად შეთანხმების საგანი რომ არის ამნისტია, არის კატეგორიულად მიუღებელი. მე დღეს, რა თქმა უნდა, ამნისტიას მხარს არ დავუჭერ იმიტომ, რომ პოლიტიკური თანამდებობის პირებს და მე ეს ამნისტია არ გვჭირდება და "ოცნებამ" მიაღწია იმას, რომ, 20 ივნისის შტურმის ორგანიზატორები დღეს შეიძლება გახდნენ ამნისტირებულები და მათ ვიღაცამ სამუდამო იმუნიტეტი შესძინა იმიტომ, რომ თურმე პოლიტიკური მართლმსაჯულების ნაწილი გახდა ნიკა მელია, რომელიც პირდაპირ მოუწოდებდა ადამიანებს პარლამენტის შტურმისკენ", — განაცხადა გახარიამ.

შარლ მიშელის დოკუმენტის ერთ-ერთი მთავარი პუნქტი 20 ივნისის საქმეების ამნისტიას ეხება. დოკუმენტში მითითებულია, რომ ხელმოწერიდან ერთი კვირის ვადაში, პარლამენტში წარმოდგენილმა პარტიამ ამნისტიის კანონის ინიცირება უნდა მოახდინოს, რომელიც 2019 წლის 19-21 ივნისის პროტესტებთან დაკავშირებულ ყველა დარღვევასა და დაკავებას შეეხება.