ქართული ოცნების დეპუტატის, ალუდა ღუდუშაურის თქმით, გიორგი გახარიას გადადგომის დროს გაკეთებული განცხადებები ახლანდელ განცხადებებთან აცდენილია.

"ჩვენ ყველას კარგად უნდა გვესმოდეს ერთი რამ, რომ პოლიტიკაში მოსვლა ან გნებავთ, შემობრუნება, ტყუილის და სიცრუის ხარჯზე არის ძალიან ცუდი. ამიტომ ბატონი გახარია იყოს ქვეყნის პრემიერმინისტრი, შინაგან საქმეთა მინისტრი და თუ მართლაც ასეთ რამეს ხედავდა, მაშინ სად იყო ბატონი გახარია? ასევე, ძალიან ცუდი არის როდესაც ბატონი გახარია საუბრობს თავისი გადადგომის მიზეზებზე აბსოლუტურად სხვა მიზეზებს ასახელებს, როცა ჩვენ გვახსოვს მისი ის განცხადებები, რომელიც გადადგომის დროს გააკეთა და არის აცდენილი ერთმანეთთან. ამიტომ მე იმედს ვიტოვებ, რომ გახარია დაუბრუნდება თანმიმდევრულობის რეჟიმს და არ დაადგება, არ გააგრძელებს სიცრუის ტირაჟირებას. სიმართლე გითხრათ, სანამ ბატონი გახარია პრეზენტაციას გამართავდა, მოლოდინი მქონდა, რომ სადღაც მე-3 მე-4 ადგილი ამ არჩევნებში დაეკავებინა მის პოლიტიკურ ძალას, მაგრამ ამ პრეზენტაციის შემდეგ ჩემთვის და ვფიქრობ, საზოგადოებისთვის ნათელი გახდა, ეს შანსები კიდევ უფრო შემცირდა და ალბათ, მე-5 მე-6 ადგილზე თუ გავა", — ამბობს ღუდუშაური.

29 მაისს გიორგი გახარიამ პარტიისა და გუნდის პრეზენტაცია გამართა. პარტიას საქართველოსთვის ჰქვია. 18 თებერვალს ის პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.

ამ ეტაპზე გახარიას გუნდში ქართული ოცნების 6 ყოფილი დეპუტატია. მმართველი პარტიიდან წავიდნენ და ყოფილ პრემიერმინისტრს უერთდებიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე.

გარდა ამისა, გახარიას პოლიტიკურ პარტიას უერთდებიან NATO-ში საქართველოს ყოფილი ელჩი, ლევან დოლიძე და ყოფილი პრეზიდენტის, გიორგი მარგველაშვილის ადმინისტრაციის ხელმძღვანელი, გიორგი აბაშიშვილი.