დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, ინდური შტამი საყურადღებო მუტაციაა და ბრიტანული შტამის მსგავსად უფრო მარტივად ვრცელდება, თუმცა პანიკის საფუძველი არ არის.

ჟურნალისტების კითხვაზე, რა განსხვავებაა ბრიტანულ და ინდურ შტამებს შორის და არის თუ არა ინდური უფრო მეტად საშიში, ის პასუხობს:

"ძალიან გთხოვთ, ნუ დავპანიკდებით, იმიტომ, რომ ამ კოვიდ პანდემიის პერიოდში ამ კორონავირუსმა ძალიან ბევრი მუტაცია განიცადა ამ წელიწადნახევრის განმავლობაში. მათ შორის, იყო ძალიან მსუბუქი მუტაციები, მათ შორის, არის მუტაციები, რომელსაც მეტი ყურადღება ექცევა. სწორედ ეს რაც ჩამოვთვალე, 5 მუტაცია. ბრაზილიური, სამხრეთ აფრიკული, ბრიტანული, ინდური და კიდევ არის რამდენიმე, მათზე მეტი დაკვირვება მიმდინარეობს.

ბრიტანულმა მუტაციამ როცა მეტი საზოგადოებრივი ჯანმრთელობითი ყურადღება მიიქცია და მაშინ ითქვა და დადასტურებულია, რომ ის შედარებით უფრო ადვილად ვრცელდება, განსაკუთრებით უფრო ახალგაზრდა მოსახლეობაში. დაახლოებით ამ ტიპის გახლავთ ინდური შტამიც", — განაცხადა მან.

ამავროულად გამყრელიძე ამბობს, რომ ინდოეთში კორონავირუსის შემთხვევათა ზრდა არამხოლოდ ინდურზე, არამედ დიდწილად ბრიტანულ შტამზე იყო დამოკიდებული.

"ინდოეთში, როცა ამ ბოლო ერთი თვის განმავლობაში მდგოამრეობა საყურადღებლო იყო იქ წამყვანი მაინც ბრიტანული შტამი იყო და არა ინდური. თუმცა ინდური შტამის ხვედრითი წილიც დიდი იყო", — განაცხადა მან.

მანვე აღნიშნა, რომ არ არის მოსალოდნელი ინდური შტამის დაფიქსირების გამო შეზღუდვები გამკაცრდეს, თუმცა ამაზე საბჭო იმსჯელე

ინდური შტამის შემთხვევები საქართველოში

დაავადებათა კონტროლის ცენტრის ინფორმაციით, საქართველოში ინდური შტამით ინფიცირების შემთხვევები დაფიქსირდა. კერძოდ, როგორც NCDC-ში ამბობენ, ინდური შტამი დაუფიქსირდა ქვეყანაში შემოსულ 5 მოგზაურს.

დააავადებათა კონტროლის ცენტრის დირექტორის, ამირან გამყრელიძის განცხადებით, 5-დან 2 საქართველოს მოქალაქეა. მისივე თქმით, 3-მა უცხოელმა ქვეყანა უკვე დატოვა, საქართველოს მოქალაქეების კონტაქტები კი იდენტიფიცირებულნი და იზოლირებულნი არიან.

"მათზე მიმდინარეობს მეთვალყურეობა. ისინი არიან სახლის პირობებში და დაავადება მიმდინარეობს მსუბუქად", — განაცხადა მან.

როგორც გამყრელიძემ აღნიშნა ისინი საქართველოში მაისის შუა რიცხვებში შემოვიდნენ და შუა აღმოსავლეთის ერთ-ერთ ქვეყანაში მოგზაურობის ისტორია ჰქონდათ.

გამყრელიძის თქმით, ინდური შტამის გამოვლინება ხდება სპეციფიური PCR ტესტით და შემდგომ დასტურდება გენომის სეკვენირებით.