ნაციონალური მოძრაობის თავმჯდომარე, ნიკა მელია აცხადებს, რომ ნამახვანჰესის მოწინააღმდეგე აქტივისტების გზავნილი დროდადრო "გაიბლარა".

"საუბრობდნენ რიონის ხეობის დამცველები, რომ ისინი არ იყვნენ არსებითად წინააღმდეგი, რომ ჰესები აშენდეს, მაგრამ დროდადრო ეს მათი გზავნილი, ჩემი აზრით, გაიბლარა და ისე დაილექა საზოგადოების არც თუ ისე უმნიშვნელო ნაწილში, თითქოს ეს ადამიანები, ვინც აპროტესტებენ ნამახვანჰესის გარშემო განვითარებულ მოვლენებს, წინააღმდეგები არიან მშენებლობის. ეს მეტად უნდა იყოს ახსნილი საზოგადოებისთვის მათი მხრიდან, მეტი სიცხადე უნდა შეიტანონ იმიტომ, რომ ერთი მხრივ, საპროტესტო აქცია, რომელსაც ადგილი აქვს ამა თუ იმ ქალაქში, რა თქმა უნდა, მისასალმებელია, მაგრამ არ უნდა მოხდეს ეს ყველაფერი იმის ხარჯზე, რომ საზოგადოება შეცდომაში შევიყვანოთ და ხვალ და ზეგ და სამ-ოთხ წელიწადში ქვეყანა აღმოჩნდეს აბსოლუტურად განიარაღებული და ბოლომდე დამოკიდებული ენერგეტიკული თვალსაზრისით განსაკუთრებულად მტრულად განწყობილ სახელმწიფოზე", — ამბობს მელია ფორმულას ეთერში.

25 მაისს ნამახვანჰესის მოწინააღმდეგეთა აქციის ლიდერმა, ვარლამ გოლეთიანმა განცხადა, რომ 26 მაისის აქციის შემდეგ რიონის ხეობაში დაბრუნდებიან და კომპანია ENKA-ს მუშაობას ხელს ადგილზე შეუშლიან.

23 მაისს ვარლამ გოლეთიანმა რესპუბლიკის მოედანზე მოთხოვნები გააჟღერა და მათ შესასრულებად ხელისუფლებას 24 მაისის 12:00 საათამდე მისცა.

მოთხოვნები, რომლებიც გოლეთიანმა აქციაზე გააჟღერა შემდეგია:

  • დატოვოს რიონის ხეობა კომპანიამ ენკამ;
  • გაწყდეს ენკასა და სახელმწიფოს შორის დადებული ხელშეკრულება და გაუქმდეს ყველა ის დოკუმენტი, რომელიც 2015 წლიდან დღემდეა გაცემული;
  • გამოცხადდეს მორატორიუმი ენერგოსექტორში;
  • გადადგეს ეკონომიკის მინისტრი და დადგეს არამხოლოდ ნათია თურნავას, არამედ ჰესის დოკუმენტაციის მომზადებაში ჩართული ადამიანებიც პასუხისმგებლობის საკითხი.

ნამახვანჰესის მოწინააღმდეგეებსა და ხელისუფლებას შორის უშედეგო მოლაპარაკებების შემდეგ პროტესტის დედაქალაქში გადმოტანის გადაწყვეტილება მიიღეს. მთავრობამ მათ ჰესის მშენებლობაზე ერთი წლის განმავლობაში მორატორიუმი შესთავაზა, თუმცა აქციის მონაწილეების თქმით, მოსამზადებელ სამუშაოები არ გაჩერებულა.

პროტესტის თავდაპირველი ადგილი სოფელი ნამოხვანია, სადაც რამდენიმე თვის განმავლობაში ისინი ნამახვანჰესის მშენებლობას უწყვეტად აპროტესტებენ. მათ ადგილზე კარვები ჰქონდათ გაშლილი.

ისინი ამბობენ, რომ ეკოლოგიური საფრთხის გარდა, მთავრობამ მშენებელ კომპანიასთან გაფორმებული ხელშეკრულებით სახელმწიფო ინტერესები დათმო.

რიონის ხეობის აქტივისტებისგან განსხვავებით, ნამახვანჰესის კასკადის აუცილებლობასა და წარმატებაზე საუბრობს ხელისუფლება. ეკონომიკის სამინისტროს არაერთხელ განუცხადებია, რომ ეს პროექტი ქვეყნის ენერგოდამოუკიდებლობისკენ და უსაფრთხოებისკენ ერთ-ერთი აუცილებელი ნაბიჯია.

რიონის ხეობაში ჰესს კომპანია ენკა აშენებს. ENKA აცხადებს, რომ ნამახვანჰესის პროექტი დეტალურადაა შესწავლილი და რაიმე საფრთხეს მოსახლეობისთვის ან ხეობისთვის არ წარმოადგენს.

გაიგე მეტი: