ოსკარის ნომინანტმა კანადელმა მსახიობმა, ელიოტ პეიჯმა, საკუთარ ინსტაგრამზე საცურაო კოსტიუმში გადაღებული ფოტო გამოაქვეყნა, რომელსაც ინტერნეტმომხმარებლებისგან დადებითი გამოხმაურება მოჰყვა.

"ტრანსგენდერის პირველი საცურაო კოსტიუმი", — წერს წერს Juno-სა და The Umbrella Academy-ის ვარსკვლავი ფოტოს აღწერაში.

"საკუთარ სხეულში კომფორტულად ყოფნის" მნიშვნელობაზე ელიოტმა ოპრა უინფრისთან ჩაწერილ ინტერვიუშიც ისაუბრა.

"როცა შხაპიდან გამოდიხარ, წელზე პირსახოცშემოხვეული და სარკეში იხედები, ამბობ: 'ეს მე ვარ'", — ასე უპასუხა მსახიობმა შეკითხვას, თუ რამ აღაფრთოვანა ტრანზიციის პერიოდში ყველაზე მეტად.

გასული წლის დეკემბერში ელიოტ პეიჯმა პირველად განაცხადა საკუთარი გენდერული იდენტობის შესახებ, შეიცვალა სახელი და მისი მისამართით გამოყენებადი ნაცვალსახელები.

"მომწონს, რომ ტრანსგენდერი ვარ. მომწონს, რომ ქვიარი ვარ. და რაც უფრო ვუახლოვდები და ვუგებ საკუთარ თავს, მით მეტად ვოცნებობ, მეტად ფართოვდება ჩემი გული და უფრო ბედნიერი ვხდები", — აღნიშნა ვარსკვლავმა მაშინ.

ელიოტის განცხადებამ დიდი გამოხმაურება გამოიწვია და მსახიობმა მხარდასაჭერი კომენტარები და გზავნილები მიიღო, როგორც გულშემატკივრებისგან, ასევე საკუთარი კოლეგებისა და სხვა ცნობილი ადამიანებისგან.

მას შემდეგ, ელიოტი თავადაც აქტიურად ცდილობს ტრანსგენდერი ადამიანების პრობლემებსა და უფლებებზე ისაუბროს და ცნობიერება აამაღლოს.

"მივმართავ ყველა პოლიტიკურ ლიდერს, ვინც ტრანსადამიანების ჯანდაცვის კრიმინალიზებას ცდილობს და ჩვენი არსებობის უფლებას უარყოფს, ასევე ყველა მასშტაბურ პლატფორმას, რომელიც ტრანსთემის მიმართ შუღლის თესვას განაგრძობს — თქვენ ხელები სისხლით გაქვთ მოსვრილი", — წერდა პეიჯი, — "აგრეთვე მივმართავ ყველა ტრანსგენდერ ადამიანს, ვისაც ძალადობასთან, საკუთარი თავის სიძულვილთან, ჩაგვრასთან და ძალადობრივ მუქარებთან გამკლავება ყოველდღიურად უხდება — მე თქვენ გხედავთ, მიყვარხართ და ყველაფერს გავაკეთებ, რათა ეს მსოფლიო უკეთესობისკენ შევცვალო".