ეკონომიკის მინისტრის, ნათია თურნავას განცხადებით, ნამახვანჰესის მშენებლობის მოწინააღმდეგეებთან სასაუბროდ დიალოგის ბევრი ფორმატია შექმნილი, მაგრამ საუბარი გაჭირდება ქუჩაში "ბლოკირებით, პარალიზებით, რაც ტურისტების და ეკონომიკის გახსნის მოლოდინში არის აბსოლუტურად მიუღებელი".

თურნავამ ხაზი გაუსვა, რომ არსებობს არაერთი ფორმატი, მათ შორის ევროკავშირის წარმომანდგენლის და სახელისუფლებო გუნდის ჩართულობით. მანვე განაცხადა, რომ საუბარი არ უნდა გასცდეს ენერგეტიკის სექტორს და არ უნდა გადავიდეს რადიკალიზმში.

აქციის მონაწილეებმა არაერთხელ განაცხადეს, რომ ეკონომიკის მინისტრმა მათთან სასაუბროდ შეხვედრა დააგვიანა, მისვლის შემდეგ კი მალევე დატოვა შეხვედრა. ნამახვანჰესის მოწინააღმდეგეები ხელისუფლებას სწორედ კომუნიკაციის ნაკლებობაში ადანაშაულებენ. მათი განცხადებით, ახლა დიალოგის საშუალება ამოწურულია, რადგან მცდელობები უშედეგო აღმოჩნდა.

23 მაისს აქციის მონაწილეებმა განაცხადეს, რომ თუ ხელისუფლება მათ მოთხოვნებს მომდევნო დღის 12 საათამდე არ შეასრულებდა, დედაქალაქის პიკერტირებას მოახდენდნენ. რაც შეეხება ულტიმატუმის პირობებს, ისინი ითხოვენ:

  • დატოვოს რიონის ხეობა კომპანიამ ენკამ;
  • გაწყდეს ენკასა და სახელმწიფოს შორის დადებული ხელშეკრულება და გაუქმდეს ყველა ის დოკუმენტი, რომელიც 2015 წლიდან დღემდეა გაცემული;
  • გამოცხადდეს მორატორიუმი ენერგოსექტორში;
  • გადადგეს ეკონომიკის მინისტრი და დადგეს არამხოლოდ ნათია თურნავას, არამედ ჰესის დოკუმენტაციის მომზადებაში ჩართული ადამიანებიც პასუხისმგებლობის საკითხი.

მოთხოვნები არ შესრულდა, შესაბამისად, აქციის მონაწილეები მსვლელობებს მართავენ და ქუჩებს კეტავენ.