გიორგი კვირიკაშვილმა ზუგდიდში, კორცხელის საარჩევნო უბანთან, 22 მაისს მომხდარ ინციდენტზე კომენტარი გააკეთა და განაცხადა, რომ ეს იყო დასაგმობი ინციდენტი და მომავალში უფრო მეტი მობილიზაცია იქნება სამართალდამცავების მხრიდან:

"რაც მოხდა არჩევნებზე სამეგრელოში, ეს არის მიუღებელი და ასეთი პრეცედენტი აღარ უნდა განმეორდეს. ერთხელ და სამუდამოდ უნდა გადავშალოთ ფურცელი, როცა არჩევნები ძალადობით და მუშტი კრივით ტარდებოდა"

პრემიერ მინისტრის თქმით, ეს ინციდენტი უნდა იქნას გამოძიებული და დამნაშავეები უნდა დაისაჯონ:

"ეს იქნება სახელმწიფოს ღირსების საკითხი, რომ არჩევნები ჩავატაროთ და მივცეთ საშუალება ჩვენს მოქალაქეებს მშვიდობიან გარემოში მისცენ ხმა მათ რჩეულს".

ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობდა, ნაციონალური მოძრაობის წევრებს, მათ შორის გიგა ბოკერიასა და ნიკა მელიას, ფიზიკური შეურაცხყოფა მიაყენეს.