სოციალური სამართლიანობის ცენტრში აცხადებენ, რომ რიონის ხეობაში, ნამახვანჰესის მშენებლობის საწინააღმდეგო პროტესტს სახელმწიფო მეტწილად საპოლიციო ძალებით პასუხობდა. ეს მათივე შეფასებით, უგულებელყოფს პრობლემის გადაჭრის კონსტრუქციულ და დიალოგზე ორიენტირებულ გზებს.

დოკუმენტში, რომელიც ნამახვანჰესის მშენებლობის საწინააღმდეგო პროტესტის პარალელურად ღონისძიებების შეფასებას ეხება ვკითხულობთ, რომ სამართალდამცავი ორგანოები დაუსაბუთებლად და დისპროპორციულად ერეოდნენ პროტესტის მონაწილეთა გადაადგილების, შეკრებისა და გამოხატვის თავისუფლებაში. სოციალური სამართლიანობის ცენტრი ყურადღებას ამახვილებს აქტივისტთა დაკავებისა და დაჯარიმების შემთხვევებზეც, რაც, მათივე შეფასებით "პროცესის ესკალაციას უწყობს ხელს და რადიკალიზების საფრთხეებს ზრდის".

ორგანიზაცია ეხმაურება 11 აპრილს, სოფელ ნამოხვანში საპროტესტო კარვების დაშლისა და ტერიტორიის გადათხრის ფაქტს.

"სამართალდამცავებმა კარვების დაშლის საფუძვლად მდინარე რიონის ადიდების საფრთხე მიუთითა, რისი რისკებიც რელევანტური მეტეოროლოგიური საექსპერტო დასკვნით დღემდე არ არის დადასტურებული", — ვკითხულობთ ორგანიზაციის განცხადებაში.

სოციალური სამართლიანობის ცენტრში აცხადებენ, რომ სახელმწიფოს უარი აქტივისტთა მოთხოვნაზე, კარვები ისევ ნამახვანში, ალტერნატიულ ადგილას განეთავსებინათ ნიშნავს, რომ მიზანი არა პროტესტის მონაწილეთა უსაფრთხოება, არამედ კონკრეტულ სივრცეში პროცესების შეწყვეტა იყო.

"აქციის ორგანიზატორებისთვის სწორედ სოფელ ნამოხვანის ტერიტორიაზე აქციის ჩატარება იყო გამოხატვის არსებით კომპონენტი, რადგან ამ ლოკაციიდან უშუალოდ შეეძლოთ ჰესის მოსამზადებელ სამუშაოებზე ვიზუალური დაკვირვება და პროტესტის ადრესატამდე მიტანა", — აცხადებენ ორგანიზაციაში.

სოციალური სამართლიანობის ცენტრის შეფასებით, სახელმწიფოს აქვს ხისტი და რეპრესიული პოლიტიკა, რითაც "დაუსაბუთებლად და თვითნებურად ერევა რიონის ხეობის მცველების მშვიდობიან შეკრების უფლებაში". ორგანიზაციაში აცხადებენ, რომ ეს მიდგომა პროცესების გართულების რისკებს ქმნის.

ნამახვანჰესის საწინააღმდეგო პროტესტი 23 მაისიდან რიონის ხეობიდან დედაქალაქში გადმოინაცვლებს.

გაიგე მეტი: