ევროპული საქართველოს ყოფილი წევრის, ტარიელ ნაკაიძის განცხადებით, მნიშვნელოვანია, პარლამენტში იყოს ადამიანი, ვინც იქ ეთნიკური და რელიგიური უმცირესობების საკითხებს დააყენებს. მისი თქმით, თავადაც ყოფილა დისკრიმინაციული მოპყრობის მსხვერპლი.

"მივიღე მე გადაწყვეტილება, იმ მიზეზიდან გამომდინარე, რომელიც ჩემს ბექგრაუნდს წარმოადგენს. განსაკუთრებით, რელიგიური და ეთნიკური უმცირესობების უფლებების დაცვის თვალსაზრისით. კონკრეტულად, პირადად მე ვყოფილვარ ხოლმე მსხვერპლი სხვადასხვა დისკრიმინაციული მოპყრობისა და ვფიქრობ, რომ საქართველოს პარლამენტში ძალიან მნიშვნელოვანია ადამიანი, რომელიც აღნიშნულ თემას საკუთარ თავზე გამოცდილებით დააყენებს საკითხებად და შესაბამისად, შეეცდება მისი მოგვარების გზების პოვნას", — თქვა მან.

ნაკაიძე პარლამენტში დღეს, 19 მაისს მივიდა. მან საქართველოს მე-10 მოწვევის პარლამენტში შესვლა 18 მაისს გადაწყვიტა და პარტია დატოვა.

რაც შეეხება ევროპულ საქართველოს, პარტიაში 18 მაისს განაცხადეს, რომ საპარლამენტო საქმიანობაში ჩართვას არ აპირებენ. ნაკაიძის თქმით, პარტიის გადაწყვეტილება პარლამენტში არშესვლასთან დაკავშირებით მისთვის გასაგები და მისაღებია, მაგრამ მნიშვნელოვანია საკანონდებლო ორგანოში წარმოადგინოს რელიგიური და ეთნიკური უმცირესობები და თემები, რომლებიც აქამდე ნაკლებად განიხილებოდა.

აღსანიშნავია, რომ 2020 წლის არჩევნების შედეგად, ევროპულმა საქართველომ სულ 5 მანდატი მიიღო. მართალია, პარტია ოფიციალურად პარლამენტში არ შედის, მაგრამ იმ ადამიანებმა, რომლებიც არჩევნებზე ევროპულ საქართველოს წარმოადგენდნენ, საპარლამენტო საქმიანობაში ჩართვა გადაწყვიტეს. კერძოდ, დავით ბაქრაძემ, შალვა შავგულიძემ, არმაზ ახვლედიანმა და ტარიელ ნაკაიძემ. კიდევ ერთი მანდატი კი ელენე ხოშტარიას ეკუთვნის, რომელიც პარლამენტში შესვლას არ აპირებს, თუმცა უკვე დატოვა ევროპული საქართველო და ახალი პოლიტიკური მოძრაობა შექმნა.

ოპოზიციური პარტიების დიდი ნაწილი პარლამენტში შევიდა. განსხვავებული პოზიცია აქვს ლეიბორისტულ პარტიას, ასევე, ამ დროისთვის უცნობია ნაციონალური მოძრაობის საბოლოო გადაწყვეტილება.