ეროვნული ბანკის ინფორმაციით, 2021 წლის აპრილში ქვეყანაში შემოსული ფულადი გზავნილების ნაკადების მოცულობამ 194,1 მილიონი აშშ დოლარი (666,9 მილიონი ლარი) შეადგინა, რაც 145%-ით (115 მილიონი აშშ დოლარით) მეტია 2020 წლის აპრილის ანალოგიურ მაჩვენებელზე.

მიმდინარე წელს დაფიქსირებული 145%-იანი წლიური ზრდა იმით არის გამოწვეული, რომ 2020 წლის აპრილში ფულადი გზავნილები მკვეთრად შემცირდა. ეს სწორედ ის პერიოდი იყო, როდესაც მსოფლიოში კორონავირუსით გამოწვეული მკაცრი შეზღუდვები დაწესდა.

უცხოეთიდან საქართველოში ფულადი გზავნილების 86% იმ 10 უმსხვილეს პარტნიორ ქვეყანაზე მოდის, საიდანაც აპრილში ჯამურად 167,7 მილიონი დოლარი გადმოირიცხა.

ასეთია ტოპ-10 ქვეყნის ჩამონათვალი, საიდანაც აპრილში ყველაზე მეტი მოცულობის თანხა მივიღეთ:

  1. რუსეთი — 33,3 მილიონი დოლარი;
  2. იტალია — 31,7 მილიონი დოლარი;
  3. აშშ — 24,9 მილიონი დოლარი;
  4. საბერძნეთი — 21,7 მილიონი დოლარი;
  5. ისრაელი — 15,5 მილიონი დოლარი;
  6. თურქეთი — 9,7 მილიონი დოლარი;
  7. აზერბაიჯანი — 9,1 მილიონი დოლარი;
  8. უკრაინა — 8,7 მილიონი დოლარი;
  9. გერმანია — 8,7 მილიონი დოლარი;
  10. ესპანეთი — 4,4 მილიონი დოლარი;

გარდა ამისა, აპრილის თვეში კიდევ 5,2 მილიონი დოლარის ფულადი გზავნილი მივიღეთ.

უნდა აღინიშნოს, რომ 2021 წლის აპრილში საქართველოდან საზღვარგარეთ 25,8 მილიონი აშშ დოლარი (88,5 მილიონი ლარი) გადაიგზავნა, რაც 2020 წლის აპრილის (10 მილიონი აშშ დოლარი) ანალოგიურ მაჩვენებელთან შედარებით 157,6%-ით მეტია.