დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, გუშინ, 20:00 საათზე სინოფარმით ვაქცინაციაზე რეგისტრაცია მეორე დოზაზე დაიწყო, რომელიც იმ ადამიანებს ეხება, ვინც 4 მაისს აიცრნენ პირველი დოზით და უნდათ ზუსტად 21-ე დღეს აიცრან.

"მოგეხსენებათ, რომ სინოფარმით 18 წელს გადაცილებული მოქალაქეები იცრებიან. ორ აცრას შორის შუალედი 21-დან 28-დღეა, თუმცა არ გამოირიცხება, თუ რაღაცა პირობების გამო ადამიანი მეორე დოზაზე მისვლას ვერ შეძლებს 21-28 დღის ფარგლებში, სახელმწიფო ყველაფერს გააკეთებს იმისთვის, მეორე დოზა მან შესაბამისად მიიღოს.

გუშინ, 20:00 საათზე დაიწყო რეგისტრაცია მეორე დოზაზე, რომელიც ეხება იმ ადამიანებს, ვინც 4 მაისს აიცრნენ პირველი დოზით და უნდათ ზუსტად 21-ე დღეს აიცრან. ხოლო მათ, ვისაც 21-28 დღის ფარგლებში უნდათ აიცრან, მათთვის პორტალზე შესაბამისი ფანჯარა 20 მაისს გაიხსნება. ამიტომ, რადგანაც ჩვენი საკომუნიკაციო კამპანიები მოიკოჭლებს და არ იყო ეს ზუსტი ინფორმაცია, პორტალის გადატვირთვაც გუშინ, გვიან ღამე გამოიწვია სწორედ იმან, რომ ბევრმა ადამიანმა მიიღო ინფორმაცია, რომ სინოფარმზე რეგისტრაცია კვლავ გაიხსნა", — განაცხადა გამყრელიძემ.

მისივე თქმით, ქვეყანაში დღემდე სინოფარმის 100 000 დოზაა. აქედან აიცრება 50 000 მოქალაქე და დანარჩენი 50 000 ყველა მოქალაქეს მეორე აცრისთვის ენახება.

გამყრელიძის განცხადებით, დღევანდელი მონაცემებით, სონოფარმით 17 492 ადამიანია აცრილი და ჯავშანი აქვს გაკეთებული 26 577-ს.