ახალი ქართული სტარტაპის — Sliceit-ის შექმნის იდეა პანდემიაში გაჩნდა, როდესაც მთელი მსოფლიო ახალი რეალობის წინაშე აღმოჩნდა და ადამიანებმა დროის უდიდესი ნაწილის სახლში გატარება დაიწყეს. სულ მალე სოციალურ ქსელებში საინტერესო ტენდენცია გამოიკვეთა, მოყვარულმა და პროფესიონალმა მზარეულებმა საკუთარი კერძების ამსახველი ფოტოები და ვიდეოების გამოქვეყნება დაიწყეს. ამას კი რეცეპტების გაზიარება მოჰყვა არა მხოლოდ მეგობრების წრეში, არამედ უცხო ადამიანებთანაც კი.

"ეს საინტერესო დამოკიდებულება შესაძლებლობად ვაქციეთ და გადავწყვიტეთ მზარეული და გურმანი ერთმანეთთან დაგვეკავშირებინა. სწორედ ამიტომ, კულინარიის მოყვარულებისთვის ისეთ პლატფორმას ვქმნით, რომელიც მათ საკუთარი კერძისა თუ რეცეპტის ფართო აუდიტორიასთან გაცნობის საშუალებას მისცემს", — ამბობს დამფუძნებელი, ნინი ქვირია.

Sliceit ვებ და მობილური აპლიკაციაა, სადაც მომხმარებელი ერთდროულად გურმანიცაა და მზარეულიც. მას შეუძლია LIVE რეჟიმში დაესწროს კერძის მომზადების პროცესს, პირადად გაიცნოს, მზარეული, დისტანციურად დაათვალიეროს სამზარეულო და გასინჯოს ან შეაფასოს გაკეთებული კერძები.

ფოტო: Sliceit

სტარტაპის ერთ-ერთი ყველაზე საჭირო დეტალი ისაა, რომ დიასახლისებს შემოსავლის მიღება იმ საქმიდან შეუძლიათ, რომელსაც დიდი მონდომებით აკეთებენ.

მაგალითად, ნებისმიერ მომხმარებელს შეუძლია დაპოსტოს რა კერძს ამზადებს, როდის იქნება მზად და რა ეღირება. გურმანებს 3-დან 5 კილომეტრის რადიუსში შეუძლიათ თვალი გადაავლონ, რა კერძები მზადდება. თუ მივლენ და წამოიღებენ მხოლოდ კერძის საფასურს გადაიხდიან, თუმცა მზარეულს კერძის მიტანა თავადაც შეუძლიათ. გურმანს, ასევე, შეუძლია ესტუმროს მზარეულს სახლში, ფასს კი მზარეული სურვილისამებრ ირჩევს.

დიასახლისების გარდა, კულინარიის მოყვარული სტუდენტებიც ფულის გამომუშავებას მარტივად შეძლებენ, საერთო საცხოვრებლებში ან სტუდენტურ ქალაქებში.

პლატფორმა ძალიან მალე გამოჩნდება, მისი გამოყენება კი ნებისმიერ დაინტერესებულ პირს შეეძლება.