ახალქალაქისა, კუმურდოსა და კარის მიტროპოლიტი ნიკოლოზი ამბობს, რომ ძალადობა მიუღებელია, თუმცა ყველაფერს თავისი გამომწვევი მიზეზი აქვს. მიტროპოლიტი მთავარი არხის ჟურნალისტზე სასულიერო პირის მხრიდან თავდასხმას გამოეხმაურა.

"ძალადობა ყოვლად გაუმართლებელია. მეუფე ანტონს თვითონაც არ მოსწონს თავისი საქციელი, მეც არ მომწონს. უბრალოდ აქ საუბარია იმაზე, რომ მოახერხა ჟურნალისტმა და მეთერთმეტე მცდელობაზე გამოიყვანა მწყობრიდან იმიტომ, რომ ადამიანი ვარ. მეუფე ანტონის საქციელი მიუღებელია როცა ის გამოვიდა მწყობრიდან, მაგრამ ყველაფერს აქვს თავისი გამომწვევი მიზეზი, ეს არ ამართლებს, მაგრამ ყველაფერს აქვს თავისი გამომწვევი მიზეზი", — თქვა მიტროპოლიტმა.

მთავარი არხის ინფორმაციით, 7 მაისს, ჟურნალისტ ირაკლი ვაჩიბერაძეს, პროფესიული საქმიანობის შესრულებისას ფიზიკური და სიტყვიერი შეურაცხყოფა მიაყენა ვანისა და ბაღდათის მიტროპოლიტმა ანტონმა. ტელეკომპანიის მიერ გავრცელებულ კადრებში ჩანს, რომ ინტერვიუსთვის მისულ ჟურნალისტს მეუფე ანტონი აგრესიით ხვდება და მოუწოდებს, რომ ადგილი დატოვოს. მოგვიანებით კი მიტროპოლიტი ვაჩიბერაძეს ხელი დაარტყა.

მიტროპოლიტ ანტონის გაღიზიანება მოჰყვა ჟურნალისტის კითხვას 6 მაისს, ურბნელი მიტროპოლიტი იობის რეზიდენციაში მომხდარ შემთხვევასთან დაკავშირებით, როცა ერთ-ერთ სასულიერო პირს ფიზიკურად დაუპირისპირდნენ.