დეკანოზი ილია ჭიღლაძე აცხადებს, რომ საქართველოს მართლმადიდებლულ ეკლესიას არ ჰყავს წმინდა სინოდი. ასე გამოეხმაურა იგი ვანისა და ბაღდათის მიტროპოლიტის, ანტონის თავდასხმას მთავარი არხის ჟურნალისტზე.

"ადამიანზე ხელით შეხებისათვის მიტროპოლიტი ანტონ ბულუხია რჯულის კანონის მიხედვით ამიერიდან განკვეთილია მღვდელმთავრობიდან. ეპისკოპოსი სვიმეონ ცაკაშვილი 6 მაისიდანაა განკვეთილი მღვდლის ცემის გამო. არავითარი წმინდა სინოდი ჩვენ არ გვყავს. წმინდა სინოდის ნაცვლად გვყავს სუფთა ნახირი. წერტილი", — წერს დეკანოზი საკუთარ ფეისბუქგვერდზე.

მთავარი არხის ინფორმაციით, 7 მაისს, ჟურნალისტ ირაკლი ვაჩიბერაძეს, პროფესიული საქმიანობის შესრულებისას ფიზიკური და სიტყვიერი შეურაცხყოფა მიაყენა ვანისა და ბაღდათის მიტროპოლიტმა ანტონმა. ტელეკომპანიის მიერ გავრცელებულ კადრებში ჩანს, რომ ინტერვიუსთვის მისულ ჟურნალისტს მეუფე ანტონი აგრესიით ხვდება და მოუწოდებს, რომ ადგილი დატოვოს.

მიტროპოლიტ ანტონის გაღიზიანება მოჰყვა ჟურნალისტის კითხვას 6 მაისს, ურბნელი მიტროპოლიტი იობის რეზიდენციაში მომხდარ ფაქტთან დაკავშირებით. შეგახსენებთ, რომ საქმე ეხება დეკანოზ თეიმურაზ თათარაშვილს, რომელსაც სურამისა და ხაშურის ეპისკოპოსის, სვიმეონ ცაკაშვილის მძღოლი ფიზიკურად გაუსწორდა.

მიტროპოლიტ ანტონს ამ საკითხზე კითხვა ჟურნალისტებმა აქამდეც დაუსვეს, რაზეც მან უპასუხა რომ მათთან საუბარი არ სიამოვნებდა და ეს საკითხი არ აინტერესებდა.