საპატრიარქოს ფონდის ხელმძღვანელი, ლაშა ჟვანია ამბობს, რომ პატრიარქმა უნდა გადაწყვიტოს, საპატრიარქოს პრესმდივანი მიქაელ ბოტკოველი დატოვებს თუ არა თანამდებობას. აღნიშნულ თემაზე ჟვანიამ გვიან ღამით, საპატრიარქოს დატოვების შემდეგ უთხრა ჟურნალისტებს:

"მამა მიქაელის გათავისუფლება არის პრეროგატივა და სრული კომპეტენცია აქვს პატრიარქს. მე როგორც ვიცი, მისი ეს ემოციური გადაწყვეტილება არ შეუთანხმებია მის უწმინდესობასთან, ამიტომ დაველოდოთ, ეს არ არის ცალმხრივი, მამა მიქაელს ემოციებით შეიძლება სურვილი აქვს თანამდებობის დატოვების, მაგრამ მისი უწმინდესობის გადაწყვეტილებას დაველოდოთ".

ჟვანიამ ასევე ისაუბრა პატრიარქის დაცვის უფროსის, სოსო ოხანაშვილის შესახებაც:

"სოსო ოხანაშვილის დანიშვნა და გათავისუფლება არის შინაგან საქმეთა სამინისტროს კომპეტენცია, ამიტომ დაველოდოთ, საკითხების აჟიტირება საჭირო არ არის".

23 თებერვალს მიქაელ ბოტკოველმა ჟურნალისტებს უთხრა, რომ ბერლინიდან ჩამოსვლის შემდეგ ოხანაშვილი საპატრიარქოში არ უნახავს, რასაც მოჰყვა ოხანაშვილის საპასუხო განცხადება. მან საპატრიარქოს პრესმდივანი სიცრუეში დაადანაშაულა და თქვა, რომ ის საკუთარ მოვალეობას ასრულებდა. ამის საპასუხოდ, ბოტკოველმა პროტესტის ნიშნად თანამდებობის დატოვების შესახებ განაცხადა.