Game of Thrones-ის მსახიობი ესმე ბიანკო მერილინ მენსონს სექსუალური, ფიზიკური და ემოციური ძალადობისთვის უჩივის.

მსახიობმა სარჩელი ლოს-ანჯელესის ფედერალურ სასამართლოში შეიტანა, სადაც მან განაცხადა, რომ როკერმა ის ინგლისიდან ამერიკაში ცრუ მიზეზებით ჩამოიყვანა. მუსიკოსი ბიანკოს მის კლიპში მონაწილეობას და ფილმში როლს სთავაზობდა, თუმცა სინამდვილეში არცერთი პროექტი არ შედგა.

ფოტო: HBO/Game OF Thrones

სარჩელის მიხედვით, პირველი ინციდენტი 2009 წელს მოხდა. მენსონი გეგმავდა კლიპის გადაღებას სიმღერაზე I want to kill you like they do in the movies. მსახიობს, ამერიკაში ჩამოსვლის შემდეგ სასტუმროს ნაცვლად მენსონის სახლში უწევდა დარჩენა, კლიპის გადასაღებად კი სამუშაო ჯგუფი დაქირავებული არ იყო, მას მენსონი თავად იღებდა საკუთარი ტელეფონით.

როგორც სარჩელშია აღწერილი, მენსონი ბიანკოს არ აძლევდა ჭამის და წყლის დალევის უფლებას, მომღერალმა ის ოთახში გამოკეტა, აწამა ელექტროშოკით და მასთან სექსუალური კავშირის დამყარება სცადა. ამის შემდეგ მათ დისტანციური ურთიერთობა ჰქონდათ.

ფოტო: Getty Images

მენსონმა სამეფო კარის თამაშების მსახიობი 2011 წელს ისევ ჩამოიყვანა ამერიკაში, ამჯერად ფილმში მონაწილეობის მიზეზით. როგორც სარჩელშია აღწერილი, მეორე ვიზიტისას ბიანკო სახლში გამოკეტა, სხეულზე ჭრილობები მიაყენა, შემდეგ ფოტოები გადაუღო და ონლაინ განათავსა. მსახიობი არც ამას დათანხმებულა.

"ბიანკოს წლები დასჭირდა იმის გასაგებად, თუ რამდენად მოქმედებდა მასზე მომღერლის ფიზიკური, სექსუალური, ფსიქოლოგიური და ემოციური ძალადობა. ფსიქიკური ჯანმრთელობის გაუარესების გამო მისმა კარიერამ დიდი კრახი განიცადა", — ნათქვამია სარჩელში, "ამ ეტაპზე იგი ებრძვის რთულ პოსტტრავმულ სტრესულ აშლილობას, შფოთვას, დეპრესიას და პანიკურ შეტევებს".

მერილინ მენსონი სექსუალურ შევიწროებაში სხვა მსახიობებმაც დაადანაშაულეს. ბიანკომ მენსონის წინააღმდეგ განცხადება პირველად თებერვალში გააკეთა, მას შემდეგ, რაც მსახიობმა ევან რეიჩელ ვუდმა სოციალურ ქსელებში განაცხადა, რომ როკერის მხრიდან ფიზიკური და სექსუალური ძალადობის მსხვერპლი იყო.

ფოტო: Getty Images

ბრალდებებს მენსონი უარყოფდა. ამჯერად მომღერლის ადვოკატმა განაცხადა, რომ ბიანკოს განცხადებები სიმართლეს არ შეესაბამება. პარალელურად, მენსონი სხვადასხვა პროექტიდან მოხსნეს. მის წინააღმდეგ გამოძიება ოჯახში ძალადობის მუხლითაც მიმდინარეობს.