დედაქალაქის მერის, კახა კალაძის განცხადებით, 1 წლის ვადაში თბილისის გარე განათების სისტემა განახლდება.

მისი თქმით, მუნიციპალიტეტი გარე განათების განახლების პროექტისთვის დამატებით დაფინანსებას არ გამოყოფს. ის მომდევნო ათი წლის განმავლობაში, ელექტროენერგიის დაზოგვის შედეგად გაკეთებული ეკონომიის ფარგლებში დაიფარება.

"ჩვენ დავიწყეთ ქალაქის გარე განათების პროექტზე მუშაობა. ჩავატარეთ ტენდერი, გამოვავლინეთ გამარჯვებული კომპანია, რომელსაც დავუკვეთეთ თბილისის გარე განათების გენერალური კონცეფცია და გეგმა, რომელიც უკვე შემუშავებულია, ჩაბარებულია და ეს გეგმა ითვალისწინებს ქალაქის ქუჩების სამ კატეგორიად დაყოფას. ამ პროექტის განხორციელების მიზნით, მიმდინარე კვირას თბილსერვის ჯგუფი გამოაცხადებს ელექტრონულ ტენდერს, რომელიც ითვალისწინებს მთელი ქალაქის მასშტაბით გარე განათების განახლებას 10-წლიანი გადახდის პირობით", — განაცხადა მან.

მისი თქმით, ამ ტენდერის საშუალებით ქალაქში მთლიანად შეიცვლება გარე განათების სისტემა და ეს საშუალებას მისცემს მერიას, გარკვეული რაოდენობის თანხაც დაზოგოს. მერის თქმით, პროექტის განხორციელების ვადა 1 წელია.