ნაციონალური მოძრაობის თავმჯდომარე, ნიკა მელია აცხადებს, რომ ის ვერ შევა პარლამენტში, სადაც 20 ივნისს ძალადობაში მონაწილე პირებს შეიწყალებენ. გადაჭრით უარს მელია არ ამბობს, თუმცა აცხადებს, რომ გაუჭირდება.

"იმ პარლამენტში, სადაც მოხდება ყველა მოძალადის და ყველა ჯალათის შეწყალება, ამნისტიის გავრცელება, მე პირადად გამიჭირდება იქ შესვლა. 99,9% მე იქ ვერ შევალ და არ შევალ", — განაცხადა ნიკა მელიამ TV პირველთან სატელეფონო ინტერვიუში.

დღეს, 27 აპრილს ცნობილი გახდა, რომ ამნისტიის შესახებ კანონპროექტის ორი ვერსია დაინიცირდება — ერთი ქართული ოცნების და მეორე, ოპოზიციის. ოპოზიციის ლიდერების განცხადებით, მათ ვერსიაში საუბარია დაზარალებულის ნების გათვალისწინებაზე, ქართული ოცნებისაში კი არა.

სტრატეგია აღმაშენებლის ლიდერის, გიორგი ვაშაძის განმარტებით, ორივე კანონპროექტი ითვალისწინებს ნიკა მელიას გათავისუფლებას, თუმცა ქართული ოცნების იდეაა, რომ კანონპროექტი შეეხოს მთლიანად მოვლენას და მხოლოდ გამონაკლისს სახით გამოირიცხოს ძალადობა და კონვენციური მუხლები.

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის თქმით, ამნისტიის შესახებ კანონპროექტის ქართული ოცნების ვერსიაში მაკო გომურის შემთხვევა გამონაკლისი იქნება.