ქართული ოცნების თავმჯდომარის, ირაკლი კობახიძის თქმით, ამნისტია არ იყო მმართველი პარტიის მოთხოვნა და იგი ევროპული საბჭოს პრეზიდენტის, შარლ მიშელის ეგიდით შედგენილ დოკუმენტში სწორედ საერთაშორისო პარტნიორების ინიციატივით შევიდა. თუმცა, კობახიძე ამბობს, რომ ხელმომწერები პასუხისმგებლები არიან დოკუმენტის ამ ნაწილის აღსრულებაზეც.

"ამნისტიას ითვალისწინებს შეთანხმება, რომელსაც ჩვენ ხელი მოვაწერეთ. ამნისტია არ იყო ჩვენი მოთხოვნა. პირიქით, ჩვენ არ მოგვწონდა ეს პუნქტი. თუმცა, ეს იყო ინიციატივა საერთაშორისო პარტნიორების და ამ დოკუმენტში ასახა ეს ინიციატივა. შესაბამისად, ჩვენ ვართ პასუხისმგებელი იმაზე, რომ დოკუმენტის ეს ნაწილი აღსრულდეს. შესაბამისად, ამნისტიის შესახებ კანონი უნდა იყოს მიღებული", — განაცხადა კობახიძემ.

მისი განმარტებით, ამნისტია არ შეიძლება იყოს გირაოს ან თავდებობის ალტერნატივა.

"ამნისტიის კანონი არ არის სხვა რაღაცების ალტერნატივა. საუბარი იყო იქ გირაოზე, თავდებობასა და ა.შ. ამნისტია არის ერთადერთი ზომა, რომელიც იცავს ბრალდებულს შესაძლო გამამტყუნებელი განაჩენის აღსრულებისგან. არც გირაო, არც თავდებობა და ა.შ. ამისგან არ იცავს ბრალდებულს", — ამბობს კობახიძე.

ევროპული საბჭოს პრეზიდენტის, შარლ მიშელის ინიციატივით შემქნილი დოკუმენტის იმ ნაწილმა, სადაც 20 ივნისის საქმეზე ბრალდებულების ამნისტიაზეა საუბარი, პოლიტიკურ სპექტრში აზრთა სხვადასხვაობა გამოიწვია. მმართველი პარტია და ოპოზიცია ვერ თანხმდება კონკრეტულად რომელ მუხლებს უნდა შეეხოს ამნისტია. გარდა ამისა, დისკუსიებია იმაზე, ამნისტია მხოლოდ მიმდინარე საქმეებს უნდა შეეხოს თუ იმათაც, რომელიც 20 ივნისთან დაკავშირებით მომავალში დაიწყება.

გაიგეთ მეტი: