პარლამენტის წევრის, სალომე სამადაშვილის განცხადებით, მას შემდეგ, რაც ნაციონალური მოძრაობის თავმჯდომარე, ნიკა მელია ციხეს დატოვებს, ის პარტიიდან წამოვა. წამყვანის კითხვაზე, შესაძლოა თუ არა, ის დარჩეს პარტიის რიგებში, დეპუტატი პასუხობს: "არ მგონია, გამოვრიცხავ".

"ოფიციალური განაცხადი პარტიის წევრობის დატოვებაზე არ გამიკეთებია ჯერ, ვთქვი, რომ ამაზე გადაწყვეტილებას მივიღებ ნიკას გათავისუფლების შემდეგ. არ მგონია, გამოვრიცხავ [დავრჩე პარტიის რიგებში], მაგრამ ოფიციალურ განაცხადს პარტიის დატოვებაზე გავაკეთებ ნიკას საპატიმროდან გამოსვლის შემდეგ", — განაცხადა მან რუსთავი 2-ის ეთერში.

ნაციონალური მოძრაობის პოლიტსაბჭოს წევრი, სალომე სამადაშვილი შარლ მიშელის შეთანხმებას ნაციონალური მოძრაობისგან დამოუკიდებლად შეუერთდა. მას შემდეგ, რაც სამადაშვილმა ხელმოწერაზე ენმ-ს გადაწყვეტილება გააკრიტიკა, პარტიის ხმარდამჭერები მის პირად ფეისბუქგვერდზე შეურაცხმყოფელ კომენტარებს წერდნენ.

მაშინ On.ge-სთან საუბრისას სამადაშვილმა განაცხადა, რომ პარტიის პოლიტიკურ საქმიანობაში მონაწილეობას აღარ მიიღებს. მისი თქმით იგი პარტიას არც პარლამენტში წარმოადგენს.