განახლება: მასალის თავდაპირველი სათაური იყო "მარტში კომერციულმა ბანკებმა 487 მილიონი ლარით ნაკლები სესხი გასცეს", მოგვიანებით ეროვნულმა ბანკმა შეცვლილი მონაცემები გაავრცელა, რის გამოც შეიცალა როგორც მასალის სათაური, ასევე, შინაარსი.

ეროვნული ბანკის ინფორმაციით, 2021 წლის მარტში, წინა თვესთან შედარებით, კომერციული ბანკების მიერ გაცემული სესხების მოცულობა, რომელიც ფიზიკური და იურიდიული პირების მიერ აღებულ კრედიტებს მოიცავს, 600,66 მილიონი ლარით გაიზარდა — ეს 1,56%-იანი ზრდაა. რომ არა ეროვნული ვალუტის გაუფასურება, ეს მონაცემი ნაკლებად, 0,94%-ით გაიზრდებოდა.

უფრო კონკრეტულად, ამ პერიოდში ლარში გაცემული გაცემული სესხების მოცულობა 312,82 მილიონი ლარით (1,84%-ით), ხოლო უცხოური ვალუტით — 287,83 მილიონი ლარით (1,35%-ით) გაიზარდა. რეალურად, უცხოურ ვალუტაში გაცემული სესხების მოცულობა 0,22%-ით გაიზარდა, თუმცა იქიდან გამომდინარე, რომ მარტში ლარი გაუფასურდა, ეროვნული ვალუტით გამოსახულმა კრედიტების მოცულობამ უფრო მეტად მოიმატა — ამას გაცვლითი კურსის ეფექტი ეწოდება.

ეროვნული ბანკის მონაცემებით, 2021 წლის მარტის ბოლოს კომერციულ ბანკებს იურიდიული პირებისათვის ეროვნული ვალუტით გაცემული ჰქონდათ 5,5 მილიარდი ლარის (წინა თვესთან შედარებით 2,34%-ით მეტი), ხოლო უცხოური ვალუტით 13,47 მილიარდი ლარის (წინა თვესთან შედარებით 1,21%-ით მეტი) მოცულობის სესხი (გაცვლითი კურსის ეფექტის გარეშე, 0,08%-ით მეტი).

2021 წლის მარტის განმავლობაში 1,59%-ით, ანუ 302,05 მილიონი ლარით გაიზარდა ფიზიკური პირების დაკრედიტების მოცულობა და მიმდინარე წლის პირველი აპრილისათვის 19,25 მილიარდი ლარი შეადგინა.

სებ-ის ინფორმაციით, მიმდინარე წლის პირველი აპრილის მდგომარეობით, კომერციული ბანკების მიერ გაცემული სესხების საერთო მოცულობა 39,03 მილიარდი ლარია.