შინაგან საქმეთა სამინისტროს პრესსამსახურში On.ge-ს განუცხადეს, რომ ზუგდიდში, კორცხელის საარჩევნო უბანთან ნაციონალური მოძრაობის ლიდერების ცემასთან დაკავშირებით გამოძიება მიმდინარეობს. სამართალდამცავი უწყების წარმომადგენელს ვკითხეთ, ხომ არ არიან დაკავებულები, თუმცა, გვითხრეს, რომ ამჟამად ეს არის ის ინფორმაცია, რისი თქმაც შეუძლიათ.

დღეს, 22 მაისს, ზუგდიდში, კორცხელში, ადგილობრივი თვითმმართველობის შუალედური არჩევნები გაიმართა, სადაც კორცხელის მოსახლეობამ ზუგდიდის საკრებულოში თავისი წარმომადგენელი უნდა აირჩიოს. დაახლოებით შუადღის 12 საათზე სპორტული აღნაგობის ადამიანთა ჯგუფი დაუპირისპირდა ნაციონალური მოძრაობის წევრებს, რის შემდეგაც მათ პარტიის წევრები და ლიდერები, მათ შორის გიგა ბოკერია და ნიკა მელია სცემეს. დაპირისპირებისას გამოიყენეს ჯოხები.

ტელეკომპანია ოდიშმა და სხვა ტელევიზიებმა გაავრცელეს მომხდარის ამსახველი ვიდეომასალა. რუსთავი 2–ის ინფორმაციით, დაპირისპირებაში მონაწილეობდნენ თბილისიდან სპეციალურად ჩასული სპორტსმენები. ტელეარხთან ინტერვიუში ისინი ჩხუბის დაწყებამდე აცხადებდნენ, რომ ქალაქს ტურისტული მიზნით სტუმრობდნენ, თუმცა, მოგვიანებით ჩხუბის ამსახველ ვიდეოებში ჩანან და მათი იდენტიფიცირება შესაძლებელია.

ნაციონალური მოძრაობა მომხდარში ხელისუფლებას ადანაშაულებს, ქართული ოცნება კი, ნაციონალური მოძრაობის პროვოკაციაზე საუბრობს.

ინტერნეტ გამოცემა ლაივპრესის ინფორმაციით კი, სპორტსმენები ჟურნალისტებს მუშაობაში ხელს უშლიდნენ, აყენებდნენ სიტყვიერ და ფიზიკურ შეურაცხყოფას. ასევე, ადგილზე იმყოფებოდა პოლიცია, რომელმაც ძალადობის აღკვეთა ვერ შეძლო.