საპარლამენტო უმცირესობა, მოძრაობა თავისუფლებისთვის ევროპული საქართველო, პარლამენტში ხელმოწერების შეგროვებას იწყებს მთავარი პროკურორის, ირაკლი შოთაძის, გადაყენების მოთხოვნით.

რუსთავი 2-ის ინფორმაციით, პარტიაში მიიჩნევენ, რომ შოთაძე ე.წ. ციანიდის საქმეზე და საპატრიარქოსთან დაკავშირებულ მოვლენებზე არათანმიმდევრული განცხადებების გამო უნდა გადადგეს.

"სადისციპლინო საპროკურორო საბჭოს მივმართავთ, რომ მთავარი პროკურორის საქმიანობის შესწავლა დაიწყოს. არის თუ არა დანაშაულის რაიმე ნიშანი ან დისციპლინური გადაცდომები. ამის ლოგიკური დასასრული უნდა იყოს მთავარი პროკურორის თანამდებობიდან გადადგომა. მთავარი პროკურორი პასუხს უნდა აგებდეს თავის განცხადებებზე, რადგან ამან და ასევე ხელისუფლების წარმომადგენლების განცხადებებმა გამოიწვია მნიშვნელოვანი ვნებათაღელვა საზოგადოებაში" - აცხადებს საპარლამენტო უმცირესობის მდივანი ირაკლი აბესაძე.

ერთიანი ნაციონალური მოძრაობის წევრები ყოფილ თანაგუნდელებს სოლიდარობას გამოუცხადებენ, თუმცა მიიჩნევენ, რომ მისი გადადგომა სიტუაციას ვერ გამოასწორებს.

"უნდა დადგეს კვირიკაშვილის პასუხისმგებლობა" - აცხადებს ენმ-ს წევრი თინა ბოკუჩავა.

უმრავლესობა აცხადებს, რომ ევროპული საქართველოს ქმედება არასერიოზულია, თუმცა აბესაძე მიიჩნევს, რომ უმრავლესობაშიც არის რამდენიმე პირი, რომელიც მათ მოთხოვნაზე ხელს მოაწერს.

პროკურორის საქმის შესწავლის დაწყებას პარლამენტიდან 50 ხელმოწერა სჭირდება.