ქართული ოცნების დეპუტატის, კახი კახიშვილის თქმით, ყოფილ პრემიერმინისტრს, გიორგი გახარიას ქართულ ოცნებაში ყოფნა ჯერ კიდევ მაშინ არ უნდოდა, როდესაც მაჟორიტარ კანდიდატად კახიშვილი წარადგინა. ამის შესახებ მან პალიტრანიუსის ეთერში ისაუბრა.

"მე მესმის ამ ადამიანის, რომ არ უნდოდა ქართულ ოცნებაში ყოფნა. სხვათაშორის, ეტყობოდა კიდეც ბოლო პერიოდში. მაგალითად, როდესაც მან მე წარმადგინა, როგორც მაჟორიტარი დეპუტატი, პირადად ჩემ მიმართ მხარდაჭერა არ გამოუცხადებია. კი, ისაუბრა ქართულ ოცნებაზე, რაღაცებზე, მაგრამ აი, გთხოვთ, კახას მხარი დაუჭირეთო, ასეთი რამე არ ყოფილა. აი, შეგვიძლია გადავახვიოთ ჩემი წარდგენა და ვნახოთ, ხომ? მე ვიფიქრე, რომ პიროვნულად ასე ჩათვალა ჩემზე და არ გააკეთა, მერე ვთხოვე ჩემი Staff-ის თანამშრომლებს, რომ, მაჟორიტარების წარდგენაზე ნახეთ, იყო ვინმეს მიმართ პირადი მხარდაჭერა თუ იყო, როგორც ჩემ მიმართ? სხვათაშორის, არავის მიმართ არ ჰქონდა პირადი თხოვნა, რომ ამ ადამიანს, პეტრეს, კახას, ან ვინმეს ჩემი ხათრით დაუჭირეთ მხარი. მე მაშინ მივხვდი, რომ ეს ადამიანი ახდენდა დისტანცირებას კონკრეტული ინდივიდებისგან", — განაცხადა კახიშვილმა.

გადადგომის შემდეგ, გიორგი გახარია პირველი საჯარო კომენტარი 22 მარტს გააკეთა და თქვა, რომ არსად წასვლას არ აპირებს და პოლიტიკაში რჩება. რამდენიმე საათში იმავე შინაარსის წარწერით მან ოფიციალურ ფეისბუქგვერდზე ფოტო გამოაქვეყნა. იმავე საღამოს კი მან ტვიტერზე დაპოსტა, რომ პოლიტიკური დღის წესრიგის შექმნაზე მუშაობს.

14 აპრილს, ქართული ოცნების ექვსმა დეპუტატმა პარტია დატოვა და ყოფილი პრემიერმინისტრის, გიორგი გახარიას "პარტიის მშენებლობის ახალ ეტაპზე" უერთდებიან. ესენი არიან:

  1. გიორგი ხოჯევანიშვილი;
  2. მიხეილ დაუშვილი;
  3. ანა ბუჩუკური
  4. ალექსანდრე მოწერელია;
  5. ბექა ლილუაშვილი;
  6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.