$500-მილიონიანი ევროობლიგაციების გამოშვების პროცესი წარმატებით დასრულდა, რაც ნიშნავს იმას, რომ მთავრობამ ახალი საგარეო ვალი აიღო. ინფორმაციას საქართველოს ფინანსთა მინისტრი, ლაშა ხუციშვილი ავრცელებს და დასძენს, რომ ევროობლიგაციებზე გადასახდელი საპროცენტო განაკვეთი 2,75%-ია. როგორც ცნობილია, ახალი ევრობონდები 5-წლიანია.

"ახლახან საქართველოს ფინანსთა სამინისტრომ წარმატებით დაასრულა 500 მლნ აშშ დოლარის ღირებულების ევრობონდების გამოშვება. საპროცენტო განაკვეთმა (coupon rate) შეადგინა 2,75%.

მადლობას ვუხდი ტრანზაქციაში მონაწილე ყველა საერთაშორისო (JP Morgan, Goldman Sachs, ICBC Standard) და ადგილობრივ (TBC Capital და Galt & Taggart) საინვესტიციო ბანკს, რომელთაც მნიშვნელოვანი წვლილი შეიტანეს ტრანზაქციის აღნიშნული ეტაპის წარმატებით განხორციელებაში", — ნათქვამია მინისტრის ფეისბუქ-განცხადებაში.

შეგახსენებთ, რომ 2011 წელს გამოშვებული $500-მილიონიანი ევროობლიგაციები გასულ კვირაში ბიუჯეტიდან დაიფარა. 10-წლიანი ევრობონდების საპროცენტო განაკვეთი 6,875% იყო.