სომხეთის პრეზიდენტის, არმენ სარქისიანის განცხადებით სალომე ზურაბიშვილთან შეხვედრაზე მთიანი ყარაბაღის საკითხი განიხილეს.

"ჩვენ, ასევე, შევეხეთ რეგიონალური უსაფრთხოებისა და სტაბილურობის საკითხებს. სომხეთის შემთხვევაში განვიხილეთ მთიანი ყარაბაღის წინააღმდეგ თურქეთის აქტიური და აშკარა მხარდაჭერით აზერბაიჯანის სამხედრო აგრესიის შედეგად შექმნილი ახალი რეალობის გათვალისწინებით. ჩემს ქართველ კოლეგას წარვუდგინე მთიანი ყარაბაღის საკითხში სომხური მხარის მიდგომები და სპეციალურად ხაზი გავუსვი, რომ შეუძლებელია რეგიონში ხანგრძლივი მშვიდობის დამყარება, სტაბილურობის უზრუნველყოფა არცახის პრობლემის სამართლიანი მოგვარების გარეშე, მათ შორის ეუთოს მინსკის ჯგუფის თანათავმჯდომარეების ფარგლებში კონფლიქტის მშვიდობიანი მოგვარების პროცესის აღდგენის გზით. ხაზი გავუსვი ომის შედეგად წარმოქმნილი უზარმაზარი ჰუმანიტარული პრობლემების გადაწყვეტის აუცილებლობას, მათ შორის აზერბაიჯანის მიერ დატყვევებული პირების სწრაფი გათავისუფლების საკითხს", — განაცხადა სომხეთის პრეზიდენტმა.

სომხეთის პრეზიდენტი, არმენ სარქისიანი საქართველოში დღეს, 15 აპრილს ჩამოვიდა. მას აეროპორტში დახვდნენ საგარეო საქმეთა მინისტრი დავით ზალკალიანი, პრეზიდენტის ადმინისტრაციის უფროსი ნათია სულავა და საქართველოს ელჩი სომხეთში, გიორგი საგანელიძე. ზურაბიშვილის გარდა საქრისიანი შეხვდება პარლამენტის თავმჯდომარეს, არჩილ თალაკვაძეს. გარდა ამისა, სომხეთის პრეზიდენტი დაათვალიერებს სომხურ საკათედრო ტაძარს თბილისში