ქართული ოცნებიდან წასული დეპუტატის, ბექა ლილუაშვილის განცხადებით, ყველა ბრძანება, რაც 20 ივნისის ღამეს გაიცა, იყო კანონიერი. ამის შესახებ მან TV პირველის ეთერში ისაუბრა და თქვა, რომ "მსგავსი ტიპის" ეპიზოდებზე, მისი პოზიცია "კანონის პოზიციას" ემთხვევა.

"პირველი ეპიზოდი ეს არის 20 ივნისის დღე, როდესაც გავრილოვი ხვდება პარლამენტის, როგორც სახელმწიფო ინსტიტუტის, თავმჯდომარის სავარძელში და ეს იყო ისეთი დონის შეცდომა, მათ შორის, მმართველი პარტიის მხრიდან, რომ დღემდე იმკის ამ შეცდომის პოლიტიკურ ფასს. რაც შეეხება ღამეს, აქ თქვენ გახსოვთ, რომ მოქალაქეებმა გამოხატეს ამ კონკრეტული მოვლენის მიმართ სამართლიანი პროტესტი, რომელიც პოლიციის მხრიდანაც გაზიარებული იყო.

სწორი იყო, არასწორი იყო, ამას აქვს თავისი შეფასების კრიტერიუმები. ჩვენ ვცხოვრობთ სამართლებრივ სახელმწიფოში. ამიტომ სამართლებრივად სწორი, სამართლებრივად არასწორი ეს არის სწორი ტერმინოლოგია, რომელიც უნდა გამოვიყენოთ მსგავსი ტიპის ეპიზოდებთან მიმართებაში. ასეთი ტიპის კონკრეტული მოვლენების მიმართ ჩემი პოზიცია არის ის, რაც არის კანონის პოზიცია. იმიტომ, რომ ჩვენ ვცხოვრობთ საკანონმდებლო შეთანხმებების ფუნდამენტურ საზოგადოებაში. რა თქმა უნდა, ყველა ბრძანება, რაც გაიცა, იყო კანონიერი. პოლიციის მიერ გამოყენებული საშუალებები იყო კანონიერი და ეს შეფასდა არა მხოლოდ ქართული მხარის, არამედ ჩვენი პარტნიორების მხრიდანაც", — თქვა მან.

2019 წლის 20 ივნისს საქართველოს პარლამენტში რუსი დეპუტატის, სერგეი გავრილოვის მიერ თავმჯდომარის სკამის დაკავებას საპროტესტო ტალღა მოჰყვა. მოქალაქეები და ოპოზიციის წევრები ითხოვდნენ პარლამენტის თავმჯდომარის, სუს-ის ხელმძღვანელის და შს მინისტრის გადადგომას.

მშვიდობიანი პროტესტი მოგვიანებით დაპირისპირებაში გადაიზარდა და ცენტრალურ გამზირზე მობილიზებულმა სპეცრაზმმა აქციის დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. საგამოძიებო უწყებამ დაზარალებულად 67 სამართალდამცავი და 4 მოქალაქე ცნო. ამავე საქმეზე ბრალი წაუყენეს 3 სამართალდამცავსა და 17 მოქალაქეს.

ქართული ოცნების ექვსი დეპუტატი ყოფილ პრემიერმინისტრს, გიორგი გახარიას "პარტიის მშენებლობის ახალ ეტაპზე" უერთდება. ესენი არიან:

1. გიორგი ხოჯევანიშვილი;
2. მიხეილ დაუშვილი;
3. ანა ბუჩუკური
4. ალექსანდრე მოწერელია;
5. ბექა ლილუაშვილი;
6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.