სომხეთის სახალხო დამცველის, არმან თათოიანის განცხადებით, ე.წ. ომის პარკის გახსნა ბაქოში აზერბაიჯანის გენოციდის პოლიტიკისა და არმენოფობიის მტკიცებულებაა, რომელიც სახელმწიფო დონეზეა მხარდაჭერილი.

ომბუდსმენის თქმით, გამოქვეყნებულ ვიდეოებსა და ფოტოებზე ჩანს, რომ "ექსპონატები" "პარკში" სომხეთისა და არცახის მცხოვრებლების მიმართ სიძულვილისა და მტრობის აღძვრის მიზნით არის გამოფენილი.

"ომის მსხვერპლთა, უგზო-უკვლოდ დაკარგულთა და სამხედრო ტყვეთა ხსოვნის საჯაროდ დამცირების, მათი ოჯახების უფლებებისა და ღირსების შელახვის მიზნით, დემონსტრაციულად ცინიზმით ტარდება.

იგივე ცინიზმით არის ნაჩვენები სომხეთისა და არცახის ჯარისკაცების პირადი ნივთები, ხოლო მოკლული ჯარისკაცების ჩაფხუტები იმისთვის, რომ ეს მათ ოჯახებს, სომხეთისა და არცახის საზოგადოებას დამატებით ტკივილს მიაყენებს აზერბაიჯანულ საზოგადოებაში სიძულვილის ახალ ტალღას გამოიწვევს", — წერია ომბუდსმენის მიერ გავრცელებულ განცხადებაში.

მთიანი ყარაბაღის მეორე ომში სომხეთზე გამარჯვების აღსანიშნავად, აზერბაიჯანის პრეზიდენტმა, ილჰამ ალიევმა ბაქოში "პარკი" გახსნა, რომელიც საომარ ვითარებას ასახავს. ომის პარკი ნაალაფარი ტექნიკით: სანგრებით, ჩაფხუტებითა და მოწინააღმდეგის ცვილის ფიგურებით არის გაფორმებული.

ალიევმა პარკის გახსნისას ფოტოსესია მოიწყო. პრეზიდენტის პრესსამსახურის მიერ გავრცელებულ ფოტოებში ჩანს, თუ როგორ ამაყად დადის აზერბაიჯანის პრეზიდენტი და ფოტოებს იღებს მოწინააღმდეგე მხარის ჩაფხუტებთან თუ ცვილის ფიგურებთან.