დეკანოზი გიორგი მამალაძე კლინიკაში გადაიყვანეს. ამის შესახებ ინფორმაცია On.ge-ს სასჯელაღსრულებისა და პრობაციის სამინისტროს პრესსამსახურის უფროსმა, ბაია ცანავამ დაუდასტურა.

დაკავებული დეკანოზი, სავარაუდოდ, ჩაფიძის კლინიკაში გადაიყვანეს. სასჯელაღსრულებისა და პრობაციის სამინისტროში, დეკანოზის პერსონალური მონაცემების დაცვის მიზნით, არ ამბობენ რა მიზეზით გადაიყვანეს დაკავებული საავადმყოფოში.

მთავარი პროკურატურის ცნობით, 2017 წლის 10 თებერვალს, მკვლელობის მომზადების ფაქტზე დეკანოზი გიორგი მამალაძე დააკავეს. პროკურატურის მტკიცებით, გიორგი მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ. უწყების განცხადებით, უცნობმა პირმა მიმართა პროკურატურას და მიუთითა, რომ მამალაძეს უნდა მოეხდინა მაღალი იერარქიის სასულიერო პირის სიცოცხლის ხელყოფა.